Qazaqtyń eń myqty surmergeni álem kýbogyna jalǵyz attandy
NUR-SULTAN. QazAqparat - Jamby atýdan Qazaqstan qurama komandasynyń beldi múshesi, elimizdegi úzdik surmergenniń biri Eldos Badashev Majarstanda ótetin álem kýbogynda el namysyn bir ózi qorǵamaq, dep habarlaıdy QazAqparat tilshisi.
QR Ulttyq sport qaýymdastyǵynan málim etkendeı, búgin Majarstannyń Pomaz qalasynda uıymdastyrylǵan álemdik jarystyń alǵashqy básekesi bastaldy. Dúnıejúziniń tańdaýly mergenderi úsh kezeń boıynsha baq synaıdy. Alǵashqy kezeńi Pomaz qalasynda bastalsa, ekinshi kezeńi maýsym aıynda Frantsııada jalǵasady. Al qyrkúıek aıynda Polshada ótetin úshinshi kezeńde osy álem kýbogynyń gran-prı júldesi sarapqa salynady. Pomazdaǵy básekede álem mergenderi «Vengr stıli» men «Polsha stıli» boıynsha jarysady.
Mine, osyndaı aıtýly dodaǵa qatysýǵa bel býǵan Eldos mergenniń halyqaralyq jarysqa attanýy alǵash emes. Ol buǵan deıin Túrkııa men Iordanııada ótken dúnıejúzilik festıvaldarǵa birneshe márte qatysty. Byltyr Ońtústik Koreıada at ústinen sadaq atýdan ótken Álem chempıonatynda jeńimpaz atandy.
Eldos Badashevtiń elishilik jarystardaǵy jetistikteri tipti qomaqty. Jamby atýmen 2014 jyldan bastap aınalysqan ol 2015 jyly «Qazaqstan Respýblıkasynyń sport sheberi» atandy. 2015 jyly jamby atýdan Qazaqstan chempıonatynyń kúmis júldegeri, 2016 jyly «Uly dala oıyndarynyń» jáne «Astana juldyzdary» respýblıkalyq týrnırdiń jeńimpazy boldy. 2017 jyly «Aq bıdaı» aýyl sporty oıyndarynyń kúmis júldesin ıelendi.
2016 jyldan Jambyl oblysy ákimdiginiń dene shynyqtyrý jáne sport basqarmasy «Ulttyq sport túrlerinen «Áýlıe-Ata» kásipqoı klýby» kommýnaldyq memlekettik mekemesinde jamby atý sportynan jattyqtyrýshy qyzmetin atqardy.
Eldostyń shákirt tárbıeleýde de joly boldy. Onyń shákirti Abzal Týlybekov el chempıonattarynyń birneshe dúrkin júldegeri, álem chempıony atandy. Al taǵy bir shákirti Baqdáýlet Babajan jastar arasynda el chempıonatynyń kúmis júldegeri jáne 2019 jyly ótken jastar arasyndaǵy І Azııa chempıonatynyń chempıony ataǵyn jeńip aldy. Serikbolsyn Jalǵasuly jasóspirimder arasynda Qazaqstan chempıony.
Majarstanda uıymdastyrylǵan álem kýbogy 19 mamyr kúni aıaqtalady.
