Qazaqtyń dúnıetanymdyq bolmysyn kórsetýge arnalǵan kórkem fılm jaryq kórdi
ALMATY. 30 maýsym. QazAqparat /Erlik Erjanuly/ - Rejısser, stsenarıst Jánibek Jetirý "Aqqyz" dep atalatyn tolyq metrajdy kórkem fılm túsirdi.
Avtordyń stsenarııi boıynsha túsirý jumystary 2009 jyly bastalyp, 2010 jyly aıaqtalǵan bolatyn.
"Montajdaý, dybystaý jáne taspaǵa túsirý jumystaryn endi ǵana aıaqtap shyqtyq. "Jańa ǵasyr" degen jeke stýdııam men Sháken Aımanov atyndaǵy "Qazaqfılm" kınostýdııasy birigip túsirgen bul fılm qazaqtyń dúnıeniń paıda bolýy týraly mıfologııalyq kózqarasyna negizdelgen. Ondaǵy oqıǵanyń bári osy zamanda ótedi. Basty tulǵa ańyzdy bilmese de sondaǵy keıipkerdiń is-áreketin qaıtalaıdy. Onda qazaqtyń dúnıetanymdyq bolmysyn kórsetýge talaptandyq", - deıdi Jánibek Jetirý. Onyń aıtýynsha, jańa fılmniń tusaýkeseri jarnamaǵa qajetti qarjynyń jetkiliksizdiginen kúzge qaldyrylyp otyr. Buǵan deıin onyń 40-tan astam derekti fılmderi men "Dúnıejaryq" dep atalatyn tolyq metrajdy kórkem fılmi jaryq kórgen bolatyn. Shetelderde ótken túrli halyqaralyq baıqaýlarda san márte Bas júldeni oljalap, árqıly syı-sııapatqa ıe bolǵan "Dúnıejaryq" fılmi jarnamanyń álsizdiginen otandyq kıno naryǵynda asa tanymal bola almaǵan edi.
"Dúnıejaryq" fılmin de óz qarajatyma túsirgen edim. Basty keıipkerdi Nurjuman Yqtymbaev somdaǵan bul fılmdi mamandar óte joǵary baǵalady. Alaıda eshqandaı jarnamasyz jaryqqa shyǵarǵandyqtan asa úlken tabys ákelgen joq. Sol sebepti bul joly aldymen kınofestıvalderge, sodan keıin ǵana qalyń jurtshylyqtyń nazaryna usynsam tıimdi bolady ǵoı degen pikirde júrmin. Óıtkeni ony avtorlyq ta, festıvaldik dep te ataýǵa tolyq negiz bar", - deıdi J.Jetirý.
