Qazaqtyń dástúrli mýzykasyn jetik meńgergen álemdik oryndaýshylar Astanada bas qosady
ASTANA. 24 shilde. QazAqparat - «Astana - túrki áleminiń mádenı astanasy - 2012» jyly aıasynda Qazaqstan Respýblıkasynyń Mádenıet jáne aqparat mınıstrligi «Uly dala sazy» dástúrli oryndaýshylardyń halyqaralyq festıvalin ótkizedi.
Bul týraly mınıstrliktiń baspasóz qyzmetinen málim etti.
Festıvaldiń maqsattary men mindetteri - álemdik órkenıetke aıtarlyqtaı úles qosqan qazaq halqynyń dástúrli mýzykasyn, sonyń ishinde áni men jyryn, kúıi men sazyn, eposyn jan-jaqty nasıhattaý; qazaq halqynyń daýystyq jáne aspaptyq shyǵarmashylyǵynyń órkendeýine jaǵdaı jasaý arqyly dástúrli mýzykanyń barlyq, ásirese sırek ushyrasatyn aspaptarda oryndalatyn janrlardy jańǵyrtý, damý qarqynyn jedeldetý; qazaq halqyna tán shekti aspaptar, ysqy aspaptar, úrmeli aspaptar jáne án, jyr, terme, naqyl, nasıhat óleń, dastan, epos oryndaýshylardyń halyqaralyq deńgeıde óner kórsetýine, sondaı-aq ózara tájirıbe almasýyna múmkindik týǵyzý; dástúrli mýzykaǵa, mýzykalyq folklorǵa júıeli túrde qamqorlyq jasaý isiniń jandana túsýine memleket tarapynan qoldaý kórsetý.
Festıval kúı jáne án óneri baǵyttary boıynsha ótedi.
Festıval 2012 jyldyń úshinshi toqsanynda Astana qalasynda ótedi. Oǵan Qazaqstannan ózge Reseı Federatsııasy, Qyrǵyzstan, Ózbekstan, Túrkimenstan, Mońǵolııa, Qytaı jáne t.b. elderdiń dástúrli oryndaýshylary qatysady dep kútilýde.
«Uly dala sazy» dástúrli oryndaýshylardyń halyqaralyq festıvaline qatysýshylardyń ótinishteri baıqaýdyń bastalýyna 25 kún qalǵanǵa deıin myna meken-jaıda qabyldanady: 010000, Qazaqstan, Astana qalasy, Esil aýdany, Túrkistan kóshesi 8 úı, «Olımp Palas» t/k, KJ-18, 8 kireberis, blok «L», E-mail: info@ruhdk.kz , tel: 8(7172)54-64-77, Web: http://ruhdk.kz .
