Qazaqtyń bulbuly Bıbigúl Tólegenova 85 jasqa toldy
ASTANA. QazAqparat - KSRO jáne Qazaqstan Respýblıkasynyń Halyq ártisi Bıbigúl Tólegenova 16 jeltoqsanda óziniń 85 jas mereıtoıyn toılaýda.
Bıbigúl Ahmetqyzy Tólegenova 1929 jyly Semeı qalasynda týǵan. 1954 jyly Qazaq konservatorııasyn (N.Samyshınanyń án klasy boıynsha) bitirdi. Án aıtýdy kórkem-ónerpazdar úıirmesinen bastady. B.Tólegenovanyń ánshilik talantyn tanyp, onyń óner jolyna túsýine baǵyt siltegen ári alǵash dáris bergen keńes jazýshysy G.I.Serebrıakova (sol kezde Semeıde turǵan) boldy. B.Tólegenova eńbek jolyn 1946 jyly Semeıdiń et kombınatynda jumysshylyqtan bastady. Birsypyra ýaqyt qazaqtyń opera jáne balet teatrynda istedi. 1965-1971 jyldary qazaq fılarmonııasynyń ánshi-solısi boldy. 1971 jyldan Qazaqtyń opera jáne balet teatrynda eńbek etedi. B.Tólegenovanyń qaıtalanbas oryndaýshylyq óneriniń qaınar bulaǵy - qazaqtyń halyq ánderi. Ánshiniń alýan taqyrypty repertýarynda qazaqtyń halyq ánderi ("Gaýhar tas", "Jıyrma bes"), Qazaqstan kompozıtorlarynyń shyǵarmalary (Hamıdıdiń "Bulbuly", Brýsılovskııdiń "Qos qarlyǵashy", Tólebaevtyń "Eske alýy", Rahmadıevtiń "Tarantellasy", Muhamedjanovtyń "Kóktem valsi", Tilendıevtiń "Kel erkem, Alataýyma", P.P.Chaıkovskıı men S.V.Rahmanınovtyń romanstary, N.A.Rımskıı-Korsakovtyń operalarynan arııalar, sondaı-aq Batyc Eýropa sazgerleriniń (Donıtsettı, Grıg, Shýbert) shyǵarmalary da bar. B.Tólegenova óziniń kontserttik-oryndaýshylyq ónerin sheberliktiń joǵary satysyna kóterip, klassıkalyq dárejege jetkizdi. Bul turǵyda ol "Qazaq bulbuly" atanǵan K.Baıseıitovanyń oryndaýshylyq sheberligin jalǵastyrýda. Tólegenova opera ónerine de eleýli úles qosyp, Jibek (Brýsılovskııdiń "Qyz Jibeginde"), Gúlbarshyn (Rahmadıevtiń "Alpamysynda"), Eńlik (Júbanovtyń "Eńlik-Kebeginde"), Djılda, Vıoletta (Verdıdiń "Rıgolettosy" men "Travıatasynda") t. b. partııalardy oryndady. B.Tólegenovanyń óneri respýblıka, odaq kóleminde ǵana emes, búkil dúnıe júzine tanyldy. Gastroldik saparmen Úndistan, Aljır, Egıpet, Sırııa, Vetnam, Polsha, Chehoslovakııa, Kanada, Shvetsııa, Frantsııa, Italııada bolyp, óner tolǵady. KSRO Memlekettik syılyǵynyń (1970) jáne Qazaq KSR Memlekettik syılyǵynyń (1960) laýreaty. 1957, 1958 jyldary Máskeýde ótken ónshiler baıqaýynyń laýreaty. ÝӀӀ-ӀH saılanǵan Qazaq KSR Joǵarǵy Keńesiniń depýtaty. Lenın ordeni jáne Eńbek Qyzyl Tý ordenimen, medaldarmen marapattalǵan. Qazaqstan Respýblıkasy Prezıdentiniń Jeke Altyn belgisimen (1999) marapattalǵan. KSRO jáne Qazaqstan Respýblıkasy Memlekettik syılyqtarynyń, «Tarlan» táýelsiz syılyǵynyń (2001) laýreaty. «Jyl adamy» ataǵyn alǵan (2001. Qazaqstan Juldyzdar alleıasynda Jeke juldyzǵa ıe (2002). «Oraq jáne balǵa» medaliniń jáne Lenın ordeniniń usynylýymen qosa Sotsıalıstik Eńbek Eri (1991). Astana qalasynyń jáne Shyǵys Qazaqstan oblysynyń qurmetti azamaty.
"QazAqparat" halyqaralyq aqparat agenttigi Bıbigúl Ahmetqyzyn mereıtoıymen quttyqtaıdy jáne uzaq ǵumyr tileıdi.
