Qazaqtyń birtýar azamattary M. Ǵabdýllın jáne І. Esenberlın jaıly derekti fılm túsirilýi kerek - J. Erǵalıev
KÓKShETAÝ.QazAqparat - Qazaqtyń birtýar azamattary Málik Ǵabdýllın jáne Іlııas Esenberlın jaıly derekti fılm túsirilip, jurtshylyqtyń nazaryna usynylýy kerek. Bul týraly Qazaqstan Respýblıkasy Parlamenti Senatynyń plenarlyq májilisinde Senator Jabal Erǵalıev Mádenıet jáne sport mınıstri Arystanbek Muhamedıulynyń atyna depýtattyq saýal joldady.
«Sońǵy ýaqytta Sháken Aımanov atyndaǵy «Qazaqfılm» aktsıonerlik qoǵamy ujymynyń «Ǵasyrlar ańsaǵan azattyq» «Qazaqstan joly. Táýelsizdik hronıkasy» serııasymen derekti kınolentalar jasap, qazaqstandyqtardyń nazaryna usyna bastaǵandyǵy ábden quptarlyq ıgi bir is bolǵandyǵyn aıtqan lázim. Bul Qazaqstanda kıno ındýstrııasynyń da búgingi kún talabyna saı damýǵa bet alǵandyǵyn aıǵaqtaıtyn syńaıly», -dedi Senator Jabal Erǵalıev.
El táýelsizdigin alýdaǵy jáne sol táýelsizdikti ornyqtyrýdaǵy, tarıhtyń asa qysqa merziminde Qazaqstandy álemniń damyǵan elderiniń qataryna qosa bilgen Elbasy Nursultan Nazarbaevtyń tarıhı róli «Memleket basshysy» jáne «Elbasy» atty derekti kınolentalarda jan-jaqty ári tereń kórinis taýyp, jurtshylyqtyń shynaıy iltıpatyna ıe boldy. Sonymen birge, Sháken Aımanov, Myrzataı Joldasbekov, Nurlan Orazalın jaıynda túsirilgen derekti kınolentalar da bizdiń búgingi de erteńgi de tarıhymyzdyń betteri bolyp qalary anyq.
«Qazaqfılmniń» kenjeleý qalyp bara jatqan osy bir derekti kıno túsirýdi qolǵa alyp otyrǵandyǵyna rızashylyǵymyzdy bildire otyryp, 2015 jyly týǵandaryna 100 jyl tolǵaly otyrǵan halqymyzdyń birtýar uly perzenti, dańqty panfılovshy, Keńes Odaǵynyń Batyry, Qazaqstannyń ǵylymyna eńbek sińirgen qaıratkeri, jazýshy, ádebıet zertteýshisi, pedagog, fılologııa ǵylymdarynyń doktory, akademık, professor, Memlekettik syılyqtyń laýreaty, kórnekti qoǵam qaıratkeri Málik Ǵabdýllın jáne kezinde ulttyq sanany oıatyp, qoǵamda rýhanı qozǵalys týdyrǵan, eleýli qubylys dep tanylǵan «Kóshpendiler» tarıhı trılogııasynyń avtory, qazaqtyń klassık jazýshysy, Memlekettik syılyqtyń laýreaty Іlııas Esenberlın jaıynda derekti kınolar túsirilip, jurtshylyqtyń nazaryna usynylýyn suraımyn. Bul osy eki kesek te dara tulǵalardyń júz jyldyq mereıtoılaryna arnalǵan mándi bir shara bolyp tabylar edi", - dedi óz saýalynda Senator.
