Qazaqtyń belgili jazýshysy Qalıhan Ysqaq dúnıeden ótti

ASTANA. QazAqparat - Qazaq ádebıetiniń kórnekti ókili, qalamynan jaýhar jazbalary taýsylmaǵan, qara sózdiń sheberi, belgili jazýshy, QR Memlekettik syılyǵynyń laýreaty Qalıhan Ysqaq dúnıeden ozdy. Ómirdi ózinshe órnekteı bilgen kórkemsóz sheberinen aıyrylý barsha qazaq halqyna aýyr qaıǵy, dep habarlady Ádebıet portaly.

Qalıhan Ysqaq - 1935 jyly 14 naýryzda Shyǵys Qazaqstan oblysy, Qatonqaraǵaı aýdanynyń Topqaıyń aýylynda dúnıege kelgen. Jazýshy Qalıhannyń shyǵarmalarynda kótergen problemalar men qoǵamdyq qomaqty máseleler bir kúnde, bir jylda sheshile salmaıtyn, keshegi arqyly búgingi urpaqty oılandyrýǵa jeteleıtin tereń fılosofııalyq oılarǵa aparatyn taǵlymdy týyndylar.

Búkilodaqtyq ekranǵa shyqqan birneshe tolyqmetrajdy fılmderdiń («Ushy-qıyrsyz jol», «Sarshatamyz», «Ohran bastyǵy», «Qarasha qazdar qaıtqanda») stsenarııin jazǵan. Shyǵarmalary ózbek, qyrǵyz, tájik, tatar, bashqurt, sheshen, orys, ýkraın, slovak, bolgar tilderinde jaryq kórgen. Eki tomdyq tańdamalylary 1997 jyly oqyrman qolyna tıdi.

Aýdarma salasynda L.N.Tolstoıdyń, A.P.Chehovtyń, I.S.Týrgenevtiń, A.I.Kýprınniń, I.A.Býnınniń shyǵarmalaryn qazaq tiline tárjimalady. Nobel syılyǵynyń laýreattary bolǵan jeti dramatýrgtiń pesalaryn qazaqshalaǵan.

1992 jyly «Aqsý - jer jannaty» romany úshin jazýshyǵa Qazaqstannyń Memlekettik syılyǵy berildi.