Qazaqtyń baılyǵy men fın tehnologııasyn túıindestirse, eki tarapqa da paıdaly - Saýlı Nıınıste
«Qazaqstan Ortalyq Azııadaǵy mańyzdy eldiń biri jáne atalǵan óńirdegi Fınlıandııanyń saıası jáne saýda-ekonomıkalyq salalardaǵy basty seriktesi sanalady. Qazaqstan túrli tabıǵı resýrstar men baılyqqa ıe bolyp otyr. Al Fınlıandııada tehnologııa bar. Osynaý aspektilerdi túıindestirer bolsaq, eki tarapqa da barynsha tıimdi bolar edi», - dedi Fınlıandııa Prezıdenti.
Sonymen qatar ol Fınlıandııa men Qazaqstan ózge de salalarda tıimdi yntymaqtastyqty jolǵa qoıǵanyn atap ótti.
«Bizge Qazaqstannan bilim jáne medıtsına salalarynda tájirıbe jınaý úshin kóptegen jastar keledi. Fınlıandııa álemde eń turaqty memleketterdiń birine qalaı aınalǵandyǵy týraly málimetterimizdi de zor rızashylyqpen bólise alamyz», - dedi Saýlı Nıınıste.
Esterińizge sala ketsek, búgin Elbasy Fınlıandııa Prezıdenti Saýlı Nıınıstemen shaǵyn jáne keńeıtilgen quramda kezdesý ótkizdi.
Kezdesýden keıingi birlesken málimdeme barysynda Nursultan Nazarbaev Qazaqstan-Fınlıandııa bıznesmenderi 600 mln dollardyń kelisimshartyn jasasqanyn, qazaq pen fınniń tarıhy da, taǵdyry da uqsas ekendigin, elimizdiń kólik áleýeti zor ekendigin basa aıtty.
Sapar aıasynda Memleket basshysy keshe fın bıznes kapıtandarymen júzdesti.
Kezdesý barysynda Memleket basshysy Fınlıandııadan Qazaqstan arqyly Qytaıǵa jańa temir jol baǵdary ashylatyndyǵyn aıtty jáne fın kompanııalaryn elimizdegi agroónerkásiptik keshendegi jobalardy júzege asyrýǵa shaqyrdy.
Fın kompanııalary úshin Qazaqstannyń týrızm salasy da tartymdy ekenin, ІT-kompanııalaryna da qolaıly jaǵdaı jasalatyndyǵyn atap ótti.
