Qazaqtyń batyr uly R. Qoshqarbaevqa elorda tórinen eskertkish ornatylsa ıgi - J. Dúısebaev
Búgin QR Parlamenti Májilisiniń jalpy otyrysynda Úkimet basshysyna depýtattyq saýal joldaǵan Jeksenbaı Dúısebaev osylaı málim etti, dep habarlaıdy QazAqparat.
«Uly Otan soǵysy jyldary qazaq halqynyń batyr uldary esimi tarıhta máńgi qalarlyqtaı erlikter kórsetti. Sondaı qaharmandardyń biri Reıhstagqa tý tikken Raqymjan Qoshqarbaev bolatyn. Sol zamandaǵy keri ketken shovınıstik saıasat kesirinen qazaq batyry uzaq jyldar boıy eleýsiz qaldy. Elbasymyz osy qatelikti eskerip R. Qoshqarbaevqa «Halyq qaharmany» ataǵyn bergen bolatyn. Endigi kezekte ulttyń bundaı birtýar uldaryn ulyqtap, tarıhtaǵy ádiletti ornyn belgileý, olardyń asyl qasıetterin, týǵan eli men jerine degen súıispenshiligin, ony janqııarlyq sezimmen qorǵaýyn dáripteý - jastardyń ulttyq sana sezimin oıatýǵa jaǵdaı jasaıtyny aıqyn. Sol sebepti batyrdyń týǵan jeri Astana qalasynyń mańy bolǵandyqtan jáne Uly Jeńistiń 65-jyldyǵyna oraı R. Qoshqarbaevtyń qurmetti esimi elorda kósheliriniń birine berilýi kerek. Batyr muralaryna arnap murajaı ashylǵany, Astana tórinen R. Qoshqarbaevtyń eskertkishin ornatý oryndy bolatyn edi», dedi J. Dúısebaev.
Onyń aıtýynsha, atalǵan sharalar elimizdiń álem tarıhyna qosqan úlesin belgilep qana qoımaı, keleshek urpaqtyń elge adal, patrıottyq sezimde ózine senimdi ári batyl bolyp ósýine kóp septigin tıgizedi. Toqtala ketetin jaıt, depýtat J. Dúısebaevtyń atyna Astana qalasynyń soǵys jáne eńbek ardagerleriniń atynan dál osy mazmundas hat kelip túsken.
