Qazaqtyń bas snaıperiniń esimi aqyry aqtaldy - Aıgúl Kemelbaeva maıdanger aǵasy jaıly
«Ýaqyt tóreshi. Qudaıdyń jazmyshymen rettelý ómirge tán qubylys eken. Qazaqtyń №1 snaıperi Tóleýǵalı Ábdibekovtyń esimi aqyry aqtalyp, jaryqqa shyqty. Búkil el qýandy. Er eldi saqtaıdy. Bul - aksıoma. Onyń atasy Nasyrhannyń esimi ákesi bolyp, ákesi Ábdibek famılııasy bolyp jańsaq jazylyp ketken sııaqty. Estýimshe, Tóleýǵalı Nasyrhannyń uly emes, úlken balasy Ábdibekten týǵan nemeresi. Tóleýǵalı Ábdibekovti 3 márte Keńes Odaǵynyń batyry ataǵyna usynǵan. Biraq ne kedergi bolǵan? Basty kedergi – onyń halyq jaýynyń týysy bolǵanynda. Ol anketada «Kemelbaı aǵam repressııalanǵan» dep jasyrmaı jazǵan. Kemelbaı – Tóleýǵalıdyń ákesi Ábdibektiń týǵan inisi, meniń atam, 1910 jyly týyp, 27 jasynda Magadanǵa aıdalyp kete barǵan. Artynda uly 2 jasynda tul jetim qalǵan, ol - meniń ákem Joldasbaı Nasyrhanov» dep jazdy jazýshy Facebook paraqshasynda.
Onyń sózine sensek, batyrdyń esimin jaryqqa shyǵarýǵa kóptegen adamdar atsalysqan.
«Halyq qaharmany» ataǵyn berý týraly jarlyqqa qol qoıǵan Qazaqstan Respýblıkasynyń Prezıdenti Q.K.Toqaevqa, osy saýaldy Prezıdentke jetkizgen qoǵam qaıratkeri Berik Ábdiǵalı jáne Memlekettik hatshy Erlan Qarınge, tileýqor barsha azamattarǵa alǵysym erekshe. Adamzat qoǵamy soǵys jáne beıbitshilik qubylysynan turady. Áıgili snaıper Ybyraıym Súleımenov ekeýiniń esimi bir kúnde jańǵyrǵany, janqııar erligi óshpegeni urpaq úshin qajet. «Snaıper» atty áńgimem Tóleýǵalı aǵamnyń rýhyna arnalǵan. 2015 jyly jazyldy. Keıinirek buryn belgisiz bolyp kelgen derektermen tolyqtyryp, qaıta jazdym. 6 mamyr kúni «Qazaq ádebıeti» gazetinde jaryq kórdi» deıdi Aıgúl Kemelbaeva.
Eske sala keteıik, Ekinshi dúnıejúzi soǵysynda erlikpen qaza tapqan úsh maıdangerge «Halyq qaharmany» ataǵy berilgenin habarlaǵan bolatynbyz.
Onyń ishinde surmergen Tóleýǵalı Ábdibekovke halyq jaýynyń týysy bolǵany úshin Keńes Odaǵy Batyry ataǵy buıyrmaǵan.
