Qazaqtyń áıelderi qashanda dástúrge berik- Baýyrjan Baıbek
ALMATY. QazAqparat - Almaty ákimi Baýyrjan Baıbek Respýblıka saraıynda ótken saltanatty jıynda qala áıelderin Halyqaralyq áıelder kúnimen quttyqtady, dep habarlaıdy QazAqparat tilshisi.
Qala ákimi qazirgi kezde shaǵyn jáne orta bıznesti áıelderdiń úshten biri basqaratynyn, máslıhattyń jáne Qoǵamdyq keńestiń besten birin áıelder quraıtynyn aıtty. Memlekettik qyzmetkerlerdiń basym kópshiligi - áıelder, bilim men densaýlyq salasyn ustap turǵandar da názik jandylar.
«Qazaqtyń áıelderi qashanda dástúrge berik. Eń aldymen oshaqtyń otyn mazdatyp, otbasynyń berekesin arttyryp otyrǵan da osy analar. Elbasy aıtyp ótkendeı, eger árbir otbasynda ana mahabbaty saltanat quratyn bolsa, onda barlyq elimiz kelisim men gúldenýdiń aıshyqty nuryna bólenedi. Mine, bul ana mahabbatynyń qudyreti. Biraq, Margaret Tetcher aıtqandaı, «Úı áıel áleminiń shekarasy emes, kıeli ordasy bolýy tıis». Zamanaýı áıelder osynyń aıqyn dáleli. Búgingi Almaty - áıelder bilim alatyn, rýhanı qundylyqtardy qalyptastyratyn, otbasyn quryp, bala tárbıeleıtin, baqytqa kenelip, dara tulǵaǵa aınalatyn qala. Biz osynaý qundylyqtardy saqtaýǵa jáne damytýǵa qashanda umtylatyn bolamyz», - dedi Baýyrjan Baıbek.
Aıta keterligi, Memleket basshysynyń az qamtylǵan jáne kópbalaly otbasylarǵa qoldaý kórsetý jónindegi tapsyrmasyn júzege asyrý aıasynda Almatyda 7 baǵyt boıynsha naqtyly 13 shara engen «Baqytty otbasy» qalalyq baǵdarlamasy jasaldy. Olardyń ishinde jeńildetilgen turǵyn úı ıpotekasy, qaıta oqytý jáne jumyspen qamtý, stıpendııa jáne tegin bala baqsha, jergilikti bıýdjetten bir rettik tólem kólemin arttyrý máseleleri bar.
