Qazaqtyń asyl tuqymdy aqbas sıyrynyń sany azaıyp ketti - A. Selıýlev
ASTANA. Maýsymnyń 1-i. QazAqparat /Qanat Mámetqazyuly/ - Qazaqtyń asyl tuqymdy aqbas sıyrynyń sany azaıyp ketti.
Búgin QR Parlamenti Senaty Agrarlyq máseleler jáne qorshaǵan ortany qorǵaý komıtetiniń depýtattarymen kezdesýi barysynda «Mal ónimderi» korporatsııasynyń Basqarma basshysy Aleksandr Selıýlev osylaı málim etti, dep habarlaıdy QazAqparat.
Basqarma tóraǵasynyń aıtýynsha, jalpy elimizdegi múıizdi iri qara maldyń sany 2009 jyly 1,6 esege azaıǵan. «Kórsetkishterge qaraǵanda, elimizde asyl tuqymdy maldardyń sany da óte tómendep ketken. Statıstıkaǵa súıensek, bul sanattaǵy mal úlesi barlyq mal sanynyń tek 1,25 paıyzyn ǵana quraıdy. Tipti, ózimizdiń bazalyq tuqym bolyp tabylatyn jergilikti qazaqtyń aq bas sıyrynyń sany da quldyrap barady. Bundaı tuqymdy sıyrlardyń sany bar joǵy 76 myńnan sál asady», dedi A. Selıýlev.
Onyń sózine qaraǵanda, qazaqtyń aqbas sıyry esepke alǵash tirkelgen 1950-shi jyldardaǵy kórsetkish boıynsha 1 mln. 150 myńnan asqan. Al búgingi deńgeı bundaı tuqymnyń elimizde joǵalyp bara jatqanyn kórsetedi.
