Qazaqtyń asar dástúrin zamanǵa saı qaıta jańǵyrtýymyz qajet-Memleket basshysy

NUR-SULTAN. QazAqparat - Qazaqtyń asar dástúrin zamanǵa saı qaıta jańǵyrtýymyz qajet. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Volonter jyly barshamyzǵa, ásirse jastarǵa úlken jaýapkershilik júkteıdi. Sondyqtan sizderdi osy ıgi bastamaǵa belsendi atsalysýǵa shaqyramyn. Jastarymyz muqtaj jandarǵa kómek qolyn sozýǵa árdaıym daıyn bolýy kerek. Dana qalqymyz »Jumyla kótergen júk jeńil« degen. Qaıyrymdylyq pen meıirimdilik qanymyzǵa sińgen qasıet. Qazaqta asar jasap, bir-birine kómektesip, qoldaý kórsetý dástúri bar. onyń volonterlikpen úndesetindigi sózsiz. Sondyqtan aldaǵy jyly sol dástúrdi zamanǵa saı qaıta jańǵyrtýymyz qajet», - dedi Memleket basshysy.

QR Prezıdenti osy jalpyulttyq bastamanyń negizgi qozǵaýshy kúshi jastar ekendigin basa aıtty.

«Bul iste biz belsendi jastarymyzǵa zor senim artamyz. Elge qyzmet etý tek bilimdi ǵana emes, namysty da talap etedi. jas urpaqtyń ar-namysy joǵary bolsa, memleketimizdiń mártebesi bıik bolady. Qazirgi jastar Baýyrjan Momyshulynyń «Otan úshin otqa tús, kúımeısiń» degen sózin berik ustanýy kerek. Óıtkeni, Táýelsiz Qazaqstannyń tuǵyrly tiregi, úkili úmiti, berik qalqany ózderińiz. Qaıratty jastarymyz kóp bolsa, memleketimizdiń bolashaǵy baıandy bolady dep senemin», - dedi Qasym-Jomart Toqaev.