Qazaqtyń árbir ulttyq merekesin qalt jibermeımiz - «Shalom» evreı etnomádenı birlestigi

AQTÓBE. QazAqparat - Aqtóbedegi «Shalom» evreı etnomádenı birlestiginde 600-den astam múshe bar. Qazaqstan halqy Assambleıasy úıinde ornalasqan birlestik salt-dástúrlerin saqtaıdy, qazaqtyń ulttyq merekelerin de qalt jibermeıdi, dep habarlaıdy QazAqparat tilshisi.

«Shalom» evreı etnomádenı birlestiginiń tóraıymy Polına Savıtskaıa óte belsendi, qoǵamdyq jumystarǵa aralasyp júredi. 1998 jyly óńirde evreılerdiń birlestigi qurylyp, sodan beri ujym óńirdiń áleýmettik-mádenı sharalaryna qatysyp, ulttyq salt-dástúrlerin saqtaý jolynda balalardy tárbıelep keledi. Qazirgi kúni Aqtóbede turatyn árbir evreı azamaty tarıhy men ata saltyn biledi, óz arasynda dáripteıdi.

«Elbasynyń Qazaqstan halqy Assambleıasy sekildi iri jobasy ózge elde joq, qazaq jerine ǵana tán tatýlyqtyq pen beıbitshiliktik sımvoly bolyp otyr. Qazaq jerinde turatyn árbir ult qurmetke ıe jáne osy úshin qazaq elin sheksiz syılaıdy. Al Nur - Sultan qalasynda ótetin kezekti sessııa biz úshin mańyzǵa ıe. Sebebi sessııada aýqymdy taqyryptar qamtylyp, jańa mindetter júkteledi», - dedi «Shalom» evreı etnomádenı birlestiginiń tóraıymy Polına Savıtskaıa. Ol sessııaǵa qatysýdy qurmet sanaıdy. Bul joly ekinshi ret jolǵa shyǵady.

Aqtóbedegi «Shalom» etnomádenı birlestigi qazir 600-den astam adamnyń basyn biriktirip otyr. Munda evreılerdiń ulttyq merekesi toılanyp, qazaqtyń meıramdary da atap ótiledi. Máselen, ujym Naýryz merekesinde dastarhan jaıyp, qazaqtyń ulttyq taǵamdaryn ázirleıdi. Sonymen qatar Qazaqstan halyqtarynyń birligi kúni de asyǵa kútetin mereke. Bul kúni etnomádenı birlestikter ulttyq salt-dástúrlerin kórsetip, ónerlerin ortaǵa salady.

«Men Qazaqstannan atajurtqa kóshý týraly oılaǵan emespin. Elbasy Nursultan Nazarbaev óz qamqorlyǵyna alyp, Qazaqstan halqy Assambleıasyn qurdy, ózge ult ókilderine jańa múmkindik syılady. Ózimiz qazaq ortada ósip-óndik jáne ony maqtan tutamyz», - dedi P.Savıtskaıa.