Qazaqtyń alǵashqy telerejısserleriniń birine arnalǵan kitap shyqty
ALMATY. QazAqparat - Almatyda Qazaq televızııasynyń alǵashqy rejısserleriniń biri Sholpan Qaıyrtaıqyzy Baımoldına týraly «Sholpan - tańǵy juldyz» atty kitaptyń tusaýy kesildi, dep habarlaıdy QazAqparat tilshisi.
Kitaptyń avtory - Sholpan Baımoldınanyń jubaıy, belgili pýblıtsıst Ǵadilbek Shalahmetov. Tusaý keser rásiminde sóz alǵan ǵalym Murat Áýezov atalǵan kitap Ǵadilbek Shalahmetovtiń týyndylarynyń ishindegi úzdigi ekenin atap aıtty.
«Ǵadilbek pen Sholpandy bóle jaryp qarastyra almaısyz. Kitaptyń ózi bul ekeýin tutastyryp otyr. Kitapty qoljazba kezinde muqııat qarap shyqqanmyn. Jalpy, Ǵadilbek myqty aqyn, aýdarmashy, tilshi, onyń biraz jaqsy kitaptary shyqty. Degenmen, bul kitap - Ǵadilbektiń eń jaqsy kitaptarynyń biri. Ony keshe taǵy basynan aıaǵyna deıin oqyp shyqtym, ishinde bir jarqyn sáýle bar», - dedi Murat Áýezov.
Rejıısser-ustaz, kóptegen derekti fılmderdiń avtory Sholpan Baımoldına 2010 jyly 66 jasynda ómirden ótti. Sholpan Qaıyrtaıqyzynyń esimi ulttyq aqparat keńistiginde keńinen tanymal. Ol Lenıngradtaǵy teatr jáne kıno ınstıtýtyn támámdap, alǵashqy qyzmet jolyn 1963 jyly Aqmola oblystyq teleradıokompanııasynda bastady. Sol ýaqyttan bastap óz ómirin televıdenıemen baılanystyrdy. 1965 jyly respýblıkalyq «Qazaqstan» telearnasyna aýysyp, onda «Qurdastar» jastar redaktsııasynda, ádebı-drama, mýzyka redaktsııalarynda rejısserlyq qyzmet atqardy. Ol kóp adamnyń qatysýymen úlken habarlardy efırge týra shyǵardy. Japonııa, Úndistan elderimen uıymdastyrylǵan telekópirlerge, ártúrli festıvalderge qatysyp, óz qoltańbasyn qaldyrdy. 1990 jyldary elimizge tanymal bolǵan «Naýryz», «Suhbat», «Shuǵyla», «Aıtys» habarlaryn daıyndady.
Kásibı sheberligi joǵary Sholpan Baımoldına arnanyń bas rejıssery bolyp, otandyq televızııanyń damýyna úlken úles qosty. Onyń jasaǵan fılmderi men habarlary «Qazaqstan», «Habar», máskeýlik «1 arna» TRK altyn qorlarynda saqtaýly. Keıingi jyldary ol QR Prezıdentiniń Teleradıokesheninde eńbek etip, Lev Gýmılev atyndaǵy Eýrazııa ýnıversıtetinde jastarǵa dáris oqydy.
Sholpan Qaıyrtaıqyzy týraly ǵalym, fılologııa ǵylymdarynyń doktory Myrzataı Joldasbekov estelik sózinde: «Elýinshi jyldardyń sońynda tehnıkanyń ozyq úlgisi Qazaqstanǵa kelgende osy mamandyqty alǵash meńgergenderdiń biri Sholpan Qaıyrtaıqyzy Baımoldına edi dep aıtýǵa tolyq quqymyz bar. Ol qazaq televızııasynyń negizin qalǵandardyń biri. Onyń bastaýynda turǵan jan. Sholpan sondaı jarqyraǵan adam edi», - dep jazǵan bolatyn.
Tusaýkeser rásiminde kitappen birge «Sholpannyń jaryǵy sónbeıdi» dep atalatyn Qazaqstannyń tanymal tulǵalarynyń esteligi jazylǵan kitapsha qosymsha taratyldy.
