Qazaqtyń aqbas sıyrynyń sany qansha

NUR-SULTAN. QazAqparat – Ǵylymı turǵyda qazaqtyń aqbas tuqymyn ary qaraı damytý mindeti iske asyrylyp jatyr. Bul týraly QR AShM Mal sharýashylyǵy ónimderin óndirý jáne qaıta óńdeý departamenti dırektory Erkebulan Ahmetov málim etti, dep habarlaıdy QazAqparat tilshisi.

«Muhıttyń arǵy jaǵyndaǵy elderden asyl tuqymdy iri qara mal ımporttaý qıynǵa túsetini belgili. Jalpy, bul sharalar kerek pe? Qazaqtyń aqbas sıyryn ósirý bizge tıimdi bolady ǵoı, biz nege osy baǵytta ary qaraı damytpaımyz? Bul iri qara túri bizdiń klımatqa beıimdelgen», - dep surady depýtat Maıra Aısına Májiliste asyl tuqymdy mal sharýashylyǵy salasyna arnalǵan zań jobasynyń tanystyrylymda.

Óz kezeginde Erkebulan Ahmetov qazaqtyń aqbas tuqymyn ósirýdi damytý sharalary týraly aıtyp berdi.

«Zańnamaǵa engizilgen ózgeristerge sáıkes, memleket tarapynan qazaqtyń aqbas iri qarasyn ósirýge baılanysty arnaıy sýbsıdııalar engizilgen bolatyn. Bul sýbsıdııanyń maqsaty – asyl tuqymdy jumystardy taza deńgeıde júrgizý. Sonyń esebinen qazirgi ýaqytta qazaqtyń aqbas tuqymyn 530 myń basqa deıin jetkizip otyrmyz. Jalpy, jaqsy qarqyn bar. Іri qara maldyń arasynda asyl tuqymdy maldyń satylýy qurylymyn qaraıtyn bolsaq, 65 paıyzy qazaqtyń aqbas tuqymyna tıesili. Fermeler iri qaranyń osy tuqymyna joǵary qyzyǵýshylyq bildirýde», - dedi E. Ahmetov.

Onyń sózine qaraǵanda, búginde ǵylymı turǵyda qazaqtyń aqbas tuqymyn ary qaraı damytý mindeti qoıylǵan. Bul rette 2018-2020 jyldarǵa ǵylymı jumys júrgizýge arnaıy tapsyrma berilgen. Ol boıynsha 200 mln teńgege jýyq qarajat bólindi.

Budan buryn habarlanǵandaı, Parlament Májilisinde «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasy tanystyryldy.