Qazaqtyń 21 hany men ıgi jaqsylary jerlengen Túrkistanda arnaıy mýzeı ashý kerek - Q.Aıtahanov
ASTANA. QazAqparat - Búgin Parlament Senatynyń jalpy otyrysynda senator Qýanysh Aıtahanov Túrkistan qalasynda Qazaq handyǵynyń mýzeıin ashý týraly usynys jasady.
Senator aǵymdaǵy jyldyń ereksheligine toqtala kele, tuńǵysh ret elimizde keń kólemde Qazaq handyǵynyń 550 jyldyǵy toılanatynyn atap ótti. Al ondaǵy jospar boıynsha basty is-sharalar Qazaq handyǵy qurylǵan óńir retinde Jambyl oblysynda uıymdastyrylmaq.
«Bul rette ǵasyrlar boıy Qazaq handyǵynyń astanasy bolǵan jáne handarymyz ben batyrlarymyzdyń, bıler men sheshenderimizdiń máńgilik mekeni qasıetti Túrkistan qalasyna artylar jaýapkershilik az emes. Qazaq tarıhynda nebir iri mańyzdy oqıǵalar osy Túrkistan qalasynda oryn alǵan bolatyn», - dedi senator. Osyǵan oraı, depýtat Qýanysh Aıtahanuly Qazaq handyǵynyń 550 jyldyq mereıtoıyn toılaý aıasynda Túrkistan qalasynda respýblıkalyq halyqaralyq dárejede aýqymdy is-sharalar uıymdastyrylýy tıistigin atap ótti.
«Bul rette Qazaq handyǵy degende Túrkistan ataýy eriksiz eske oralady. Óıtkeni, munda qazaqtyń 21 hany men ózge de ıgi jaqsylary jerlengen. Osyǵan oraı, Qazaq handyǵynyń 550 jyldyǵy qarsańynda Túrkistan qalasynda arnaıy mýzeı ashý tarıhymyzǵa úlken qurmet bolar edi», - deıdi senator.
Budan bólek, depýtat qazirgi tańda Túrkistanda qalalyq qazynashylyq bólimi ornalasqan Áziret Sultan kesenesi mańynda 1903 jyly salynǵan patshalyq áskerı garnızon shtaby retinde qyzmet jasaǵan tarıhı ǵımarat bar ekenin, osyny Qazaq handyǵynyń mýzeıi etip ashýǵa tolyq bolatynyn alǵa tartady.
