«Qazaqtyń 1000 kúıi» mýzykalar jınaǵynyń tanystyrylymy ǵalamat kontsertpen atalyp ótpek

Búgin elordada jınaqtyń jaryq kórýine arnalǵan baspasóz máslıhatynda Astana qalalyq Mádenıet basqarmasynyń bastyǵy Bolat Majaǵulov atap kórsetkendeı, partıtýra jınaǵy 500 danamen shyǵyp otyr. Atalmysh dúnıe Qazaqstannyń kolledjderine, ýnıversıtterine jáne óner ujymdaryna taratylyp qana qoımaı, shetel orkestrlerine de beriletin bolady.

 «Aýqymdy jumystar jasaldy. Jınaqty jasap shyǵarýǵa 30-dan astam dybys árleýshi qatysty», - deıdi ol.

Mádenıet basqarmasy bastyǵynyń sózine qaraǵanda, keleshekte mýzykalar jınaǵynyń taǵy 9 tomyn shyǵarý josparlanýda. Erteń Astanadaǵy «Qazaqstan» Ortalyq kontsert zalynda atalmysh jınaqtyń tanystyrylymy ótedi. Onda birmezgilde 350 adam qazaqtyń kúılerin oryndaıtyn bolady.

«Búl kontsertti buryn-sońdy bolmaǵan biregeı dep ataýǵa ábden bolady. Kontsertte kúı eń aldymen dombyrada tóltýma nusqada oryndalsa, keıin ony estradalyq-sımfonııalyq orkestr jalǵastyrady. Ónerimizdiń tarıhynda mundaı oqıǵa áli bolǵan emes», - dep atap ótti B. Majaǵulov.

«Qazaqtyń 1000 kúıi» partıtýrasyna qobyz, dombyra, sybyzǵy aspaptarynyń 100-ge tarta kúıleriniń notalary enip otyr. Jınaq qurastyrýshysy, Ulttyq óner ýnıversıtetiniń oqytýshysy Aıtjan Toqtaǵanovtyń aıtýynsha, bul jumysty áli de qarqyndata túsirý kerek.

«Myń kúıdiń ishinen 100 kúıdi taspaǵa jazdyq, halyq aspaptar, estradalyq, sımfonııalyq orkestrlerge, basqa da ansambl ujymdaryna laıyqtap túsirdik, endi halyq arasynda nasıhattaý kerek», - deıdi ol.

«Kúılerdi notaǵa túsirý qajet. Osy myń kúı áýeli tóltýma dombyrada, sybyzǵyda, qobyzǵa túsirilip, taǵy bir shyǵarylsa. Óıtkeni qazir dıskide keıbir ǵana kúılerdiń notalyq jazbasy bar. Kóptegen kúıler joǵalyp ketýdiń az-aq aldynda tur. Eger bolashaqta orkestrlerge taratamyz desek, tóltýma nusqasyndaǵy notalary tom-tom bolyp, Batys, Arqa, Jetisý, Qarataý, Syr óńirleri dep shyǵarsaq, bul jumystyń quny odan da arta túser edi», - dep túıindedi A. Toqtaǵanov.