Qazaqtyń «1000 kúıi» men «1000 áni» jaryqqa shyǵady - Muhtar Qul-Muhammed
ASTANA. Jeltoqsannyń 22-si. QazAqparat /Aıdyn Báımen/ - Jańa jyl qarsańynda meniń Qazaqstandaǵy búkil óner janashyrlarynan súıinshi suraýǵa bolatyn bir jaqsy jańalyǵym bar. Birinshi ret qazaq halqynyń arǵy-bergi tarıhynda, keshegi Keńes Odaǵynyń, búgingi táýelsizdik jyldarynyń tarıhynda tuńǵysh ret qazaqtyń 1000 kúıi shyǵady. Bul jańalyqty keshe Májiliste ótken Úkimet saǵatynda QR Mádenıet jáne aqparat mınıstri Muhtar Qul-Muhammed myrza jarııa etti,
dep habarlaıdy QazAqparat.
«Osy qazaqtyń 1000 kúıiniń ishinde Dına Nurpeıisovanyń ózi oryndaǵan kúıleri bar. Onyń ishinde Jappas Qalambaevtyń ózi qobyzben oryndaǵan kúıler de bar. Sonymen qatar Bolat Sarybaevtyń sybyzǵymen oryndaǵan kúıler de engen. Qazaqtyń 1000 kúıi 50 dıskige toptastyrylyp, arnaıy jaryq kórdi.
Endi bir aıdan keıin qazaqtyń 1000 áni shyǵady. Mysaly, Zataevıchtiń shyǵarǵan «Qazaqtyń 1000 áni» jınaǵynda 46 ánniń ǵana mátini bar. Al 1000 ánniń barlyǵyna derlik osy oryndaýshysymen dıskige túsýi bul qazaq tarıhynda tuńǵysh ret júzege asyrylyp otyrǵan joba. Sonyń bir dıskisi jaryq kórdi. Biz osy aptanyń aıaǵynda resmı tusaýkeserin ótkizemiz. Qalǵany kelesi jyly júzege asyrylatyn bolady. Sondyqtan osyndaı irgeli jumystar atqarylyp jatyr»,- dedi mınıstr.
QR Mádenıet jáne aqparat mınıstri Muhtar Qul-Muhammed myrza bul jańalyqty Májilis depýtaty Aıtkúl Samaqovanyń suraǵyna jaýap bergen kezde aıtty. Sonymen qatar mınıstr halqymyzdyń bulbul ánshileri Júsipbek Elebekovtiń, Ǵarıfolla Qurmanǵalıevtiń óz daýystarymen jazylǵan ánderi, sondaı-aq 1930-40-shy jyldardaǵy Jamal Omarovanyń, 1950 jyldardaǵy búginde mýzyka tanýshylar bolmasa, basqa jurt umyta bastaǵan óner tarlandarynyń kóptegen shyǵarmalary ortalyq kıno-foto qujattarynan alynyp, osy zamanǵy tsıfr tiline kóshirilip, arnaıy aýdıo dıskiler kúıinde jaryq kóre bastaǵanyn jetkizdi.
