«Qazaqtyń 100 áni» atty teńdesi joq iri telejobanyń túsirilim alańyn BAQ ókilderi alǵashqylardyń biri bolyp kóre alady
ASTANA. 16 aqpan. QazAqparat - 18 aqpan kúni Astanada «Qazaqtyń 100 áni» atty teńdesi joq iri telejobanyń túsirilim alańynda jýrnalıster qaýymymen kezdesý ótedi.
Kópshilik taǵatsyzdana kútip júrgen úlken mádenı sharanyń túsirilim alańyn BAQ ókilderi alǵashqylardyń biri bolyp kórýge múmkindik alady. Úlken mádenı sharanyń qyzyqqa toly sahna syrtyndaǵy ómiri men sońǵy úlgidegi zamanaýı tehnıkalyq jabdyqtalǵan sahnalyq túsirilim alańynyń qurylymy AQSh pen Germanııadan jetkizilgen 40 tonnaǵa jýyq shoý-qondyrǵylardan turady. Aıta keter jáıt, dál osyndaı sahnalyq qondyrǵylardy óz kontsertterinde mıllıondaǵan halyqty jınaıtyn áıgili Elton Djon, Rammstein syndy álem juldyzdary qoldanady.
«Qazaqtyń 100 áni» jobasynyń stýdııasy 110 daýys berý termınaldarymen jabdyqtalǵan. Ol termınaldar arnaıy baǵdarlamanyń negizinde júzege asatyn kompıýterlerge qosylǵan. Sonyń arqasynda jobaǵa qatysýshy árbir oıynshynyń jaýaby dál sol sátte tirkelip, qorytylady.
Bul jobaǵa úzdik otandyq mamandarmen qatar, «Evrovıdenıe» án baıqaýy syndy basqa da iri telejobalardy jasap júrgen sheteldik mamandar shaqyryldy. Shara barysynda tilshilerge atalǵan kásibı shetel mamandardyń jumysymen tanysyp, olarmen tildesýge jaǵdaı jasalady.
«Qazaqtyń 100 áni» jobasy «Qazaqstan» Ulttyq arnasynda 26 aqpannan bastalady.
