Qazaqty ózge ulttan daralaıtyn onyń tili, mádenıeti men rýhanııaty - Elbasy
«Elimiz egemendigin alǵannan keıin jaǵdaıdyń qıyndyǵyna qaramastan taǵdyrdyń jazýymen dúnıeniń tórt buryshyna tarydaı shashylǵan mıllıonnan astam qandastarymyzdy Atamekenine oralttyq. Bul kósh áli de jalǵasýda. Babalar tarıhyna qatysty dúnıejúziniń arhıvterinde shań basqan tarıhı qujattardy aldyryp, tom-tom kitaptar men oqýlyqtar shyǵaryp, ata tarıhymyzdyń aqıqatyn túgendedik», - dedi N. Nazarbaev.
Sonymen qatar, Prezıdent táýelsizdik jyldarynda 1 myń 300-ge jýyq mektep, 1200-ge jýyq densaýlyq saqtaý nysany, taǵy da tórt myńnan astam balabaqsha salynǵanyn, halyqtyń ál-aýqaty artyp, ortasha ómir uzaqtyǵy 72 jasqa deıin uzarǵanyn atap ótti.
«Azattyqtyń alǵashqy jyldarynda «Bolashaq» baǵdarlamasy qabyldanyp, on myńnan astam talantty jastardy shetelderdiń eń bedeldi ýnıversıtetterinde oqyttyq. Sol ýnıversıtetterdi bitirgender búgin elge kelip, ult bolashaǵyna qyzmet etýde. Kemelimizge kelgen soń barsha orta bilim oshaqtaryna úlgi bolsyn dep respýblıkamyzdyń ár óńirlerinde dúnıejúziniń eń bıik talaptaryna saı Zııatkerlik mektepterin ashtyq. Al kúlli joǵary bilim ordalary bıyl alǵashqy túlekterin ushyryp, álemdik deńgeıde tanylyp úlgergen Nazarbaev Ýnıversıtetine qarap boı túzeıdi. «Mádenı mura» baǵdarlamasy boıynsha ata-babamyzdyń asyl-murasyn jınaqtaǵan soń, álemdegi eń jańashyl óner ordalary salyndy. Bular arqyly biz ult mádenıetin álemdik órkenıet deńgeıine shyǵarý úshin barlyq jaǵdaıdy jasadyq deı alamyz», - dedi Elbasy.
