Qazaqtyń zııalylary bir-birine jazǵan hatynda tóte jazýdy qoldanǵan – Dıhan Qamzabekuly
ASTANA. KAZINFORM – Kezinde qazaqtyń zııaly qaýym ókilderi bir-birine jazǵan hatynda tóte jazý qarpin qoldanǵan. Bul oıdy búgin Sherhan Murtazanyń biregeı shyǵarmashylyq muralaryn Ulttyq arhıvke tabys etý rásiminde alashtanýshy ǵalym, «Qazaq gazetteri» JShS bas dırektory, akademık Dıhan Qamzabekuly aıtty.
Arhıv qoryna jazýshynyń ómiri men shyǵarmashylyǵyna qatysty buryn esh jerde jarııalanbaǵan sırek fotosýretteri, jeke hattary, jazba dápterleri jáne tarıhı-mádenı mańyzy zor ózge de qujattar ótkizildi. Solardyń ishinde jazýshynyń tóte jazýmen jazylǵan qoıyn dápteri de bar. Bul muranyń syry týraly Dıhan Qamzabekuly tarqatyp aıtyp berdi.
– Qazaqtyń zııalylary sol kezde bir-birine jazǵan hatynda tóte jazýdy qoldanǵan. Bul – Alash qaıratkerlerimen ózderin sabaqtas, sol dástúrdiń jalǵasy retinde kórsetkeni. Ekinshiden, kóp adam bul jazýdy bilmegendikten, ózara qupııa hat almasqan dep oılaımyn. 70–80 jyldary bolýy kerek, Sheraǵań da tóte jazýdy úırengen sekildi. Qoıyn dápterinde tóte jazýmen jazǵan aqyn-jazýshylardyń, ózimen jaqyn aralasqan azamattardyń attary bar. Keıbir oı-tolǵamdaryn da tóte jazýmen túsirip otyrǵan, - deıdi ol.
Aıta keteıik, qundy qor retinde tapsyrylǵan materıaldardyń qatarynda jazýshynyń áıgili «Qyzyl jebe» romanynyń túpnusqa qoljazbalary, Turar Rysqulov týraly zertteý jazbalary, sondaı-aq keńestik bılikke qarsy shyqqan qazaq zııalylarynyń kúresin sýretteıtin «Beseýdiń haty» atty eki bólimdi dramasynyń jáne basqa da shyǵarmalarynyń qoljazbalary bar.