Qazaqtyń ulttyq sýsynyn bızneske aınaldyrǵan ulytaýlyq kásipker
ASTANA.KAZINFORM - Ulytaý oblysy Baıdaly bı aýylynyń turǵyny Záýresh Jarkenova ulttyq sýsyn – ashyǵan kójeni qaıta jańǵyrtyp, bıznes kózine aınaldyrǵan. Paıdaly astyń ereksheligi jaıly Kazinform tilshisi jazady.
Ashyǵan kójeni daıyndaý ádisi qarapaıym bolǵanymen, dámin keltirý úshin árkim ártúrli ázirleıdi. Záýresh apanyń bul rette óz qupııasy bar. Ol sıyr sútine un qosyp qaınatady, keıin salqyndatyp qoıady.
- Sút qana qossaq, syldyr sý bolyp ketedi. Sondyqtan kóje qoıýlansyn dep un qosamyn. Undy kóp qosýǵa da bolmaıdy. Naqty bir kólemi bar. Tutynýshylardyń kóbisi qymyzdan góri osy sýsyndy alady. Aıtýlarynsha, tamaq ishkennen keıin asqazandy qorytýǵa jaqsy áser etedi. Shóldi de basady. Halyq toıǵa, quran oqytqanda da osy ashyǵan kójeni satyp alyp jatady,-deıdi Baıdaly bı aýylynyń turǵyny Záýresh Jarkenova.
63 jastaǵy zeınetkerdiń qazirgi isi osy. Paıdasy da jaman emes. Aıyna 300 000 teńgege jýyq tabys tabamyn deıdi Zaýresh apa.
- Sovhoz taraǵan soń, 1994 jyly men sútpen aınalysa bastadym. Aldymen sút sattym, sosyn ashyǵan kóje daıyndaýdyń erekshe tásilin úırenip aldym. Nátıjesinde osy sýsynnan paıda kóp taptym. Mine, bıyl osy bıznespen aınalysqanyma 30 jyl boldy. Balalarymyzdy osy kásiptiń arqasynda oqytyp, jetkizip, úılendirdik, - deıdi Záýresh Jarkenova Baıdaly bı aýylynyń turǵyny.
Taǵy bir ereksheligi - sýsyndy shelekke emes, kúbige ashytady. Sebebi aǵash temperatýra men ylǵaldylyqty birqalypta ustap, paıdaly dárýmender kóbeıýine yqpal etedi.
- Kúbige biz qaımaq jaǵyp, ystaımyz. Sondyqtan ashyǵan kójede ystyń dámi bolady. Sosyn dámin tatqanda, kópshilik qymyz dep qalady,- deıdi Záýresh Jarkenova.
Ulytaýlyń sýsyndy elordadan da tapsyrys berip aldyrtatyndar az emes eken.
- Men Astana qalasynyń turǵynymyn. Ashyǵan kójeni birneshe shaqyrym qashyqtyqta ornalasqan Baıdaly bı aýylyna tapsyrys beremiz. Záýresh táteniń ashyǵan kójesi baldaı. Bir ret tapsyrys bergende, birneshe lıtrge beremiz. Sosyn týǵan-týys, kórshi mańaıǵa taratamyz,-deıdi Astana qalasynyń turǵyny Altyn Baıqanova.
Zeınetker kúnine 100 lıtr ashytady. Sút jetpese, aýyl turǵyndarynan satyp alady. ıAǵnı bul bıznes tek bir áýletti ǵana emes birneshe otbasyna tabys kózi bolyp otyr.
- Aýylda buryn sút qabyldaıtyn pýnkt bolatyn. Qazir jumys istemeıdi. Al qazir turǵyndar bizge tapsyrady. Biz sútti satyp alyp, ony iske jaratamyz. Sondyqtan bul bıznestiń paıdasy kúlli aýylǵa oń áserin tıgizip jatyr, - deıdi kásipker Myńjan Sátbergenov.
Osyǵan deıin elimizde sút óndirýde aýyl sharýashylyǵy qurylymdarynyń úlesi 39 paıyzǵa jetkeni jaıly habarlaǵan bolatynbyz.