Qazaqtyń ulttyq kıimi London jurtshylyǵyn tánti etti
LONDON. KAZINFORM — Londonda 17 memleket ókiliniń salt-dástúrleri men mádenıeti pash etilgen shara bolyp ótti. Sheteldik kórermen nazaryna qazaqtyń ulttyq kıimderi de usynyldy. Kórsetilimge Qazaqstannyń Ulybrıtanııadaǵy elshiliginiń jáne «Qazfeshn Parıj» frantsýz qaýymdastyǵynyń qoldaýymen aqtóbelik dızaıner de qatysty, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Sabına Naýryzalına 15 jylǵa jýyq ýaqyttan beri ulttyq kıim tigýmen aınalysady. Óz ónimderin 2 chemodanǵa salyp, Aqtóbeden Londonǵa jalǵyz kelgen.
Áshekeı buıymdary men sándi sómkelerin qosa eseptegende qolmen kestelep tigilgen ár kóıleginiń salmaǵy ájeptáýir.
Qalyńdyq sáýkelesiniń ózi 6 kılogramm tartady. Sheteldik kórermenge usynǵan toptamasy «Naýryz» dep atalady.
Ulttyq kıimderden bólek kúndelikti ómirde kııýge arnalǵan sándi kóılekteri de bar.
«Batysqazaqstandyq ulttyq kıimderdiń basty ereksheligi, álbette, oıýlarynda. Gúl formasyndaǵy sýretter kóptep kezdesedi. Qanyq qoıý túster de erekshe ár berip tur. Ár kostıýmge sáıkesinshe áshekeı buıymdardy da tańdadyq. Qyz balanyń ajaryn asha túsetin syrǵa, órilgen burymnyń ushyn bekitý úshin taǵylatyn shashbaýy da bar», — deıdi dızaıner Sabına Naýryzalına.
Ár eldiń salty basqa… Qazaqstannan bólek Eýropa, Azııa, Afrıka elderiniń ókilderi ulttyq kıimder kıip, kópshilikti tań qaldyryp jatyr.
Kenııanyń savannalarynda turatyn jartylaı kóshpeli afrıkalyq baıyrǵy halyqtyń da aıtary bar.
Masaı taıpasynyń ókili áshekeı buıymymyz qanshalyqty kóp bolsa, sonshalyqty baı ekenimiz bilinedi deıdi.
«Bul — saltanatty sharalarda, toılarda kıetin kıimimiz. Sizderdiń de ulttyq kıimderińiz ǵajap eken! Árbir bólshegine deıin keremet. Ásirese, bas kıim óte unady. Qazaqstan týraly az ǵana bilemin. Biraq kókjıegimdi keńeıtkim keledi. Sizdermen tanysqanyma qýanyshtymyn», — deıdi Kenııa respýblıkasynyń ókili Kejıa Orege.
Kórestilimige qatysýshy memleketterdiń geografııasy áralýan. Bosnııa jáne Gertsegovına, Chehııa respýblıkasy, Meksıka, Kýveıt, Úndistan — barlyǵy 17 el.
Árqaısysy óz ultynyń mádenıetin pash etýge tyrysyp baǵýda. Óıtkeni jahandaný zamanynda biregeılikti saqtap, ult qundylyqtaryn urpaqtan urpaqqa jetkizý mańyzdy, deıdi olar.
Sahnaǵa Qazaqstannyń qyz-kelinshekteri úkili kámshat, búrmeli kóılek kıip shyqqanda kórermenniń qoshemeti tolastamady.
«Bul — London. Áralýandylyqtyń saltanat quratyn qalasy. Túrli mádenıetterdiń toǵysatyn jeri. Bizdiń qazaq halqynan, Qazaqstannan úırenerimiz kóp eken. Ulttyq kıimderińizdi álem astanasynda pash ete otyryp, elderińizge saıahatttaýǵa degen qyzyǵýshylyǵymyzdy oıattyńyzdar. Men óte erekshe áserge bólendim», — deıdi sán sarapshysy Taıvo Megoýma.
Sharanyń uıymdastyrýshysy «Londonnyń jas dıplomattary» atty eriktilerden quralǵan top.
Olar 20 jyldan astam ýaqyttan beri halyqaralyq uıymdardaǵy jas qyzmetkerlerdi biriktirip, qoǵamdyq mańyzy bar basqosýlar ótkizip keledi.
Búgingi kórsetilimniń qaıyrymdylyq maqsaty da bar.
«Sharadan túsken aqsha eki qaıyrymdylyq uıymynyń esepshotyna aýdarylady. Dúkenderden artylǵan taǵamdardy turmysy tómen otbasylarǵa taratýmen aınalysatyn mekemege jáne Sýdanda ashtyq pen kedeıshiliktiń zardabyn shegip jatqan balalarǵa kómektesetin uıymǵa jiberiledi», — deıdi sharanyń uıymdastyrýshysy Ýnro Djanchıv.
Úzilis kezinde qaıyrymdylyq jármeńkesi de uıymdastyryldy. Ár el qolóner buıymdary men ulttyq taǵamdaryn satyp, túsken qarajatty qaıyrymdylyqqa jiberdi.
Shara bıyl birinshi ret ótkizilip otyr. Bolashaqta ony jyl saıyn uıymdastyrý josparda bar.
