Qazaqtyń tuńǵysh balerınasy Nursulý Tapalovanyń pýanty Aqtóbe mýzeıinde saqtaýly tur
AQTÓBE. KAZINFORM — Aqtóbe oblystyq tarıhı-ólketaný mýzeıinde Nursulý Talapovanyń pýanty, syrǵalary, qorapshasy, sahna kıimi saqtaýly. Qyzy birneshe jyl buryn balerınanyń ózi tutynǵan buıymdardy mýzeıge tapsyrǵan.
Nursulý Tapalov — Aqtóbe óńiriniń týmasy. Ol 1923 jyly Oıyl aýdanynda ómirge kelgen. Qazaqtan shyqqan tuńǵysh balerınasy, Qazaqstannyń eńbek sińirgen ártisi.
Kóptegen qazaq kınosyna túsip, bıshiniń rólin somdady.
— 2007-2010 jyldary aralyǵynda Nursulý Tapalovanyń qyzy Toty Aqqojaeva Aqtóbe oblystyq tarıhı-ólketaný mýzeıiniń qoryna anasynyń pýanty, syrǵasy, qobdıshasyn berdi. Sonymen birge Nursulý Tapalovanyń qujattarynyń kóshirmesi qabyldandy. Olardyń qatarynda Qazaqstannyń eńbek sińirgen ártisi kýáliginiń, Tyń jerlerdi ıgerý jyldarynda berilgen kýáliktiń jáne Jeńistiń 50 jyldyǵy kýáliginiń kóshirmeleri bar. «Qurmet belgisi» ordeni kýáliginiń de kóshirmesin berdi. Mýzeıdegi 1945-1991 jyldardaǵy taqyryptyq ekspozıtsııalyq zalynda Nursulý Tapalovanyń ómirine, qyzmetine, bıshilik ónerine arnalǵan «Bı áleminiń talanty» ekspozıtsııa jasaqtalǵan, — deıdi Aqtóbe oblystyq tarıhı-ólketaný mýzeıiniń bólim meńgerýshisi Aıbek Ertemirov.
Mýzeı qorynda Nursulý Tapalovanyń fotosýretteriniń kóshirmesi de bar.
Aıta keteıik, Nursulý Tapalova 11 jasynda akademık Ahmet Jubanovtyń qamqorlyǵymen Almatyǵa bilim izdep kelip, ulttyq bılerdi naqyshyna keltire oryndaıtyn mamandardan tálim-tárbıe alǵan.
Qazaq, qyrǵyz, ózbek, armıan, ıspan, orys jáne taǵy basqa da ulttardyń bılerin óz deńgeıinde, bıik talǵammen oryndaýshy bola bildi.
Dúnıejúzine tanymal balet dúldúlderi Galına Ýlanova men Maııa Plısetskaıalarmen birge 40-jyldary Abaı atyndaǵy akademııalyq opera jáne balet teatrynyń sahnasynda «Baqshasaraı burqaǵy» spektaklinde óner kórsetip, ulttyq horeografııanyń qalyptasyp-damýyna zor úles qosty.
2010 jyly Qazaq boksynyń negizin qalaýshy Sh. Bóltekuly men qazaqtyń tuńǵysh balerına-bıshisi N.Tapalovanyń eskertkish beıiti ashylǵan edi.
