Qazaqtyń sáıgúligi Kabırhan jańa maýsymdaǵy jarystarǵa daıyndalyp jatyr

ALMATY. KAZINFORM — Álemdik deńgeıde aty shyqqan qazaqstandyq tulpar Kabırhan jańa jarys maýsymyna daıyndalyp jatyr. Bul týraly onyń ıesi Tilek Muhambetqalıev Kazinform.kz tilshisine aıtty.

Muhambetqalıevtiń aıtýyna qaraǵanda, qazir sáıgúlik Dýbaıda.

– Kabırhannyń jaǵdaıy jaqsy. Barlyǵy birqalypty. Qazir jańa maýsymǵa daıyndalyp jatyr. Jarys maýsymy qarashada bastalady, ázirshe qaı dodalarǵa qatysatyny belgisiz, - dedi ol.

Iesiniń sózinshe, Kabırhandy jattyqtyratyn komandada qazaqstandyq mamandar joq, onyń daıyndyǵyn tek sheteldik jattyqtyrýshylar qadaǵalaıdy.

Sondaı-aq ol qazaqstandyq kórermender ázirshe Kabırhandy otandyq báıgelerde kóre almaıtynyn aıtty.

– Elimizde ótetin jarystarǵa ol qatyspaıdy, sondyqtan ázirshe kórermenderdiń ony Qazaqstanda kóretin múmkindigi joq, - dedi tulpar ıesi.

Aıta keteıik, Kabırhan – álemdik deńgeıdegi ataqty jarystarda top jarǵan, Dýbaıdaǵy bedeldi báıgelerde júlde alǵan qazaq jylqysy. Ol buǵan deıin Al Maktoum Challenge dodasynda 1 mıllıon dollarlyq júldeni ıelenip, Qazaqstannyń at sporty tarıhyndaǵy úlken jetistikke qol jetkizgen edi.

Eske salaıyq, buǵan deıin Tilek Muhambetqalıev Kabırhannyń jańa maýsymǵa deıin demalatynyn jáne daıyndalatynyn aıtqan edi.