Qazaqtyń Robın Gýdy: «Elge kómek» qorynyń basshysyna qandaı aıyp taǵyldy

ALMATY. KAZINFORM — Almaty qalasynyń Almaly aýdandyq sotynda tanymal qaıyrymdylyq qorynyń basshysy bolǵan Іlııas Sárıevke qatysty aıyptaý aktisi oqyldy. 

Sotqa tóraǵalyq etýshi sýdıa — Ernar Qasymbekov. Aıyptalýshylar ornynda eki adam otyr — Іlııas Sárıev jáne ony Aqtoty Dúıseeva. Sot otyrysynda Almaly aýdany prokýratýrasynyń memlekettik aıyptaýshysy Q.Asylhan qylmystyq is boıynsha aıyptaý aktisin oqydy.

— Sárıev turaqty jumys orny bolmaı, qarjyǵa muqtaj bola otyryp, óz materıaldyq jaǵdaıyn jeńil jolmen jaqsartýdy kózdep, bótenniń múlkin ıemdenýge baǵyttalǵan alaıaqtyq jasaýǵa sheshim qabyldaǵan. Qylmystyq nıetin júzege asyrý úshin ol ózine tıesili «Qazaq Robın Gýd» atty Instagram paraqshasy arqyly muqtaj jandarǵa kómek kórsetý úshin aqsha jınaıtyny jóninde jalǵan aqparat taratqan, — dedi prokýror.

Tergeý barysynda qylmystyq árekettiń 26 epızody anyqtalyp, bir óndiris sheńberinde biriktirilgen. Sol epızodtardyń biri jábirlenýshi Qojamjarovaǵa baılanysty. Onyń týysy búırek jetkiliksizdiginen zardap shegip, Ýkraınada emdelý úshin 35 mln teńge izdestirgen. Ol Sárıevke Instagram paraqshasy arqyly qarjy jınaýdy uıymdastyrý jóninde ótinish jasaǵan. Óz kezeginde Sárıev kómek úshin 1,5 mln teńge talap etken. 2024 jyldyń 23 aqpanynda Sárıevke dep Shynar esimdi adamnyń atyna 500 myń teńge aýdarylǵan. Osylaısha ol jábirlenýshige 500 myń teńge kóleminde zalal keltirgen.

Sondaı-aq aıyptaý aktisinde «MM Travel» týrıstik fırmasy da ataldy. Sárıev pen Dúıseeva bul fırma arqyly Saýd Arabııasyna qajylyqqa jáne umraǵa barý úshin týrlar uıymdastyrǵan dep kórsetilgen.

Aıyptaý aktisine sáıkes, Sárıev pen Dúıseeva Instagram arqyly Mekkege tómen baǵada joldamalar usynǵan. Olar qajylardy lıýks nómirlerge ornalasatyrýǵa sendirip, joldama quny bar bolǵany 500–600 myń teńge bolatynyn aıtqan. Mysaly, Atyraý oblysynyń turǵyny Boranbaeva aldyn ala tólem retinde 100 myń teńge, keıin taǵy 1 mıllıon 40 myń teńge aýdarǵan.

Osylaısha, Іlııas Sárıev pen Aqtoty Dúıseevaǵa qatysty Qazaqstan Respýblıkasynyń Qylmystyq kodeksiniń 190-baby, 3-bóligi, 4-tarmaǵy boıynsha («Óte iri kólemde birneshe ret jasalǵan alaıaqtyq») aıyp taǵyldy.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.

Buǵan deıin Almaty sotynda «Elge kómek» qoryna qatysty is qaralatynyn jazǵanbyz.