Qazaqtyń kıiz úıi LEGO jıyntyǵyna aınala ma
ASTANA. KAZINFORM — Qazaqtyń ulttyq oıyndaryn zamanaýı formatta jańǵyrtyp júrgen jas kásipker Aınur Polatova qazaqtyń kıiz úıin LEGO bólshekterinen qurastyrdy. Endi jobanyń resmı ónimge aınalýy úshin 10 myń qoldaý daýysyn jınaý qajet.
Bul týraly «TALAPAI» jobasynyń avtory Aınur Polatova Jibek Joly telearnasynyń «Búgin.LIVE» baǵdarlamasynda aıtyp berdi.
Aınur Polatova 2022 jyly «TALAPAI» jobasyn bastaǵan. Jobanyń maqsaty — umyt bola bastaǵan ulttyq oıyndardy qaıta jańǵyrtyp, balalarǵa jańa formatta usyný. Ol qazaqtyń dástúrli oıyndaryn zertteý úshin Ulttyq kitaphanaǵa baryp, osy baǵyttaǵy ǵalymdarmen kezdesken.
«TALAPAI» ataýynyń ózi de jobanyń ıdeıasymen baılanysty. Kásipkerdiń aıtýynsha, qazaq tiliniń etımologııalyq sózdiginde «talapaı» sózi básekege túsip, bir nársege talasý maǵynasynda túsindiriledi. Ol balalardyń ulttyq oıyndardy qyzyǵýshylyqpen oınap, ózara jarysqanyn qalaıdy.
— Ulttyq oıyndar — jaı ǵana oıyn emes, halqymyzdyń dástúrin tanytýdyń bir joly. Sondyqtan kóp izdendim, Ulttyq kitaphanaǵa bardym, ǵalymdarmen sóılestim. Kópshilik kókpar sııaqty oıyndardy jaqsy biledi. Al ústel ústinde oınalatyn ulttyq oıyndardy izdeý qıyndaý boldy. Zertteý barysynda asyqqa baılanysty oıyndardyń kóp ekenin bildim. Meni bul oıyndardyń kúrdeli erejeleri men túrli kombınatsııalary da tańǵaldyrdy, — dedi Aınur Polatova.
Kásipker alǵashynda ulttyq oıyndarǵa arnalǵan aǵashtan jasalǵan buıymdar ázirlegen. Alaıda balalardyń qyzyǵýshylyǵy tómen bolǵandyqtan, ol oıynshyqtyń basqa formatyn izdeı bastaǵan. Osylaısha qazaqtyń kıiz úıin LEGO bólshekterinen qurastyrý ıdeıasy paıda bolǵan.
Joba avtory kıiz úıdi qurastyrýǵa alty aı jumsaǵan. Onyń aıtýynsha, eń kúrdeli kezeńderdiń biri — shańyraq, kerege men ýyqtyń qurylymyn dál berý. Sonymen qatar ulttyq oıý-órnekterdi qoldaný kezinde de birqatar shekteýge tap bolǵan.
— Balalardyń LEGO-ǵa qyzyǵatynyn baıqadym. Sodan «Nege qazaqtyń kıiz úıi LEGO jıyntyǵyna aınalmasqa?» degen oı keldi. Kompanııanyń resmı platformasyn zerttep, jobany sol jerde usynýǵa bolatynyn bildim. Kıiz úıdiń dızaınyn jasandy ıntellekt arqyly ázirlegen joqpyz. Ár kilemniń, ár oıýdyń, ár bólshektiń ózin muqııat oılastyrdyq. Shańyraq, kerege men ýyqty barynsha túpnusqaǵa uqsatýǵa tyrystyq, — dedi ol.
Qurastyrmaly kıiz úı shamamen 1 500 bólshekten turady. Onyń ishinde sandyq, kebeje, oshaq sııaqty turmystyq buıymdar bar. Syrtynda altybaqan da beınelengen. Avtordyń aıtýynsha, árbir bólshek arqyly balalarǵa qazaq halqynyń turmysy men dástúrin tanystyrý kózdelgen.
— Men balalardyń tek sheteldik keıipkerlerdi ǵana emes, óz halqynyń tarıhy men qundylyqtaryn da bilgenin qalaımyn. Mysaly, altybaqan — jaı ǵana átkenshek emes. Buryn jastar keshkisin jınalyp, tanysyp, án aıtyp, bı bılegen. Bul olardyń aralasatyn ortasy bolǵan. Osyndaı maǵynany ár bólshek arqyly jetkizgimiz keledi, — dedi ol.
Aınur Polatova jobany LEGO-nyń resmı platformasyna ornalastyrǵan. Qazir bastamaǵa 10 myń daýys jınaý qajet. Kásipkerdiń aıtýynsha, ázirge jobaǵa 8 600-ge jýyq adam qoldaý bildirgen. Qajetti daýys sany jınalǵannan keıin kompanııa usynysty qarastyrady.
Jas kásipkerdiń ulttyq naqyshtaǵy jobalary buǵan deıin de shetelde nazar aýdarǵan. Ol qazaqtyń kıiz úıi pishinindegi sómke jobasymen Louis Vuitton sán úıine hat joldap, Frantsııada kompanııa ókilderimen kezdesken. Sonymen qatar Aınur Polatova ulttyq oıyndardy Berlınde tanystyryp, qazaq mádenıetin sheteldik aýdıtorııaǵa nasıhattap júr.
Onyń aıtýynsha, basty maqsaty — ulttyq murany tek mýzeıde saqtalatyn jádiger retinde emes, balalar kúndelikti qoldanatyn, oınaı otyryp úırenetin zamanaýı ónim retinde usyný.
Budan buryn aqtóbelik oqýshylar 4 myń asyqtan kıiz úıdiń maketin jasap shyqqanyn jazǵanbyz.
