Qazaqtyń bulbuly Bıbigúl Tólegenova 95 jasta: elorda jurty mereıtoılyq keshke kýá boldy
ASTANA. KAZINFORM – Qazaqtyń bulbul ánshisi Bıbigúl Tólegenovanyń 95 jasqa tolý mereıtoıyna oraı elorda tórindegi Astana opera jáne balet teatrynda merekelik mádenı shara ótti.
Kesh Ahmet Jubanov pen Latıf Hamıdıdiń «Abaı» operasynan «Toıbastar» jarqyn kórinisimen bastaldy. Kontsert aldynda Bıbigúl Tólegenova BAQ ókilderine arnaıy suhbat berdi.
«Joǵary deńgeıli ánshi bolaıyn, halyq artısi bolaıyn, eń bastysy eldi, halyqty umytpaımyn. Óıtkeni qashanda bolsa, óz eliń men mádenıetińdi bilip, túsiný kerek. Men halyqqa 1950 jyly radıo arqyly tanyldym, halyq meniń daýsymdy alǵash radıo arqyly estidi. Sodan keıin birte-birte Qurmanǵazy atyndaǵy orkestr, jeke kontsertim arqyly shyǵarmashylyǵymdy shyńdadym. Qazir shúkir, 95 jasqa keldim, jas urpaqqa batamdy berip otyrmyn», - dedi Bıbigúl Tólegenova jýrnalıstermen kezdesý barysynda.
Mereıtoılyq keshte Bıbigúl Tólegenova baıqaýynyń laýreattary Rasýl Jarmaǵambetov pen Tatıana Vıtsınskaıa, «Astana Opera» hory, orkestri men balet trýppasy dırıjer, «Qurmet» ordeniniń kavaleri Rýslan Baımýrzın shyraıyn asyrdy.
«Men ónerde baqyttymyn, árıne, aldymen halyqtyń qoldaýymen», - deıdi Bıbigúl Tólegenova.
Odan ári qazaqtyń bulbuly óner jolynyń ońaıǵa soqpaǵanyn tilge tıek etti.
«Bári oılaıdy ǵoı, Bıbigúlge joǵary jaqta otyryp aıtý jeńil dep, meniń aıtarym, bunyń bári jeńildikpen kelgen dúnıe emes. Men qýǵyn-súrgen ushyraǵan adamnyń balasy boldym, 1937 jyly ákem atylyp ketti, sol sátten bastap, men eriksiz es jıdym, anama qamqorshy, kómekshi boldym, óıtkeni anam 7 balamen qaldy, kómek kórsetetin eti baladan men ǵana boldym», - dep tolǵandy ánshi.
Sonymen qatar elorda turǵyndary men qonaqtary Qazaqstannyń eńbek sińirgen qaıratkeri Nurlan Ónerbaevtyń mánerlep oqýyndaǵy Farıza Ońǵarsynovanyń «Bıbigúl – án» óleńin tartý etti. Odan bólek, mereıtoı ıesiniń shákirti, Qazaqstannyń eńbek sińirgen qaıratkeri Tolqyn Zabırova Latıf Hamıdıdiń «Bulbul» ánin oryndady.
Mereıtoı keshiniń mereıin ústem etken Bıbigúl Tólegenovanyń aq batasy, bulbul ánshi qos qolyn jaıyp, aq batasyn berdi.