Qazaqtyń bolmysyna jat ıdeologııalarǵa tosqaýyl qoıý qajet - Memleket basshysy

BÝRABAI. KAZINFORM – Qazir áleýmettik jelide adamǵa til tıgizý, ar-namysyn aıaqqa taptaý kóbeıip ketti. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

– Sondaı-aq búgin Bekzat Altynbekov, odan buryn Baqtyqoja Іzmuhambetov pen Svetqalı Nurjan qoǵamdyq ádep máselesin qozǵady. Bul óte oryndy dep oılaımyn. Qazir áleýmettik jelide adamǵa til tıgizý, ar-namysyn aıaqqa taptaý kóbeıip ketti. Jalǵan málimet taratýshylar bar, - dedi Qasym-Jomart Toqaev.

Osy oraıda Prezıdent mundaı keleńsiz úrdisterdi tyıý jolyn qarastyrý kerek ekenin atap ótti.

– Májilis depýtaty Ermurat Bapı elimizdegi dinı ahýalǵa alańdaýshylyq bildirip júr. Quryltaı músheleri Danııa Qydyrbaeva jáne Oljas Súleımen jat dinı aǵymdardyń jastar arasynda, ásirese sport salasynda yqpaly kúsheıip bara jatqanyn aıtty. Teris aǵymdarǵa, qazaqtyń bolmysyna jat ıdeologııalarǵa tosqaýyl qoıý qajet ekenine esh kúmán joq. Elimizde din bostandyǵyna kepildik berilgen. Biraq júgensizdikke, tártipsizdikke jol berýge bolmaıdy. Dinniń asa mańyzdy mıssııasy – ultty uıystyrý. Dinı uıymdardyń qyzmetin retteıtin qujattar osy talapqa saı bolýǵa tıis. Bul máseleni jan-jaqty qaraý kerek. Sonyń ishinde zańnamany jańa jaǵdaıǵa beıimdep otyrý óte mańyzdy, - dedi Memleket basshysy.

Budan buryn habarlanǵandaı, Prezıdent qoǵamda qyzý talqylanyp jatqan salyq reformasyna qatysty pikir aıtty.