Qazaqtyń aqbas tuqymyn eksporttyq shekteýden bosatý kerek — fermer
ASTANA. KAZINFORM — Qazaqtyń aqbas tuqymyn jáne basqa da otandyq asyl tuqymdy iri qarany shetelge shyǵarýǵa qoıylǵan shekteýden bosatý usynyldy. Bul týraly Qazaqtyń aqbas tuqymy respýblıkalyq palatasynyń atqarýshy dırektory, fermer Bahtııar Ótelbaev BIZDIÑ ORTA podkastynda aıtty.
Onyń aıtýynsha, asyl tuqymdy maldy shetelge shyǵarýdy et eksportymen teń qarastyrýǵa bolmaıdy. Munda otandyq tuqymdy taratý, selektsııalyq jumysty damytý jáne genetıka almasý máselesi bar.
— Biz de osyndaı usynyspen shyqqan edik. Qazaqtyń aqbas tuqymy — ulttyq ónimimiz, otandyq tuqymymyz. Elimizde basqa da iri qara tuqymdary bar. Solarǵa shekteý qoımaı, asyl tuqymdy mal retinde kórshi elderge satýǵa múmkindik berý kerek, — dedi Bahtııar Ótelbaev.
Ol Qyrǵyzstannyń tájirıbesin mysalǵa keltirdi. Ótelbaevtyń sózinshe, kórshi el mal eksportyna shekteý qoıǵanymen, óziniń «Arashan» tuqymyn bul talaptan bosatqan.
— Otandyq tuqymdy shetelge shyǵarý — genetıkalyq, selektsııalyq jumys. Munda et emes, asyl tuqymdy mal satylyp otyr, — dedi ol.
Fermerdiń aıtýynsha, otandyq asyl tuqymdy maldyń kórshi elderge taralýy genetıka almasýǵa múmkindik beredi. Máselen, Qazaqstan kórshi elderge asyl tuqymdy buqa satyp, qajet bolǵan jaǵdaıda sol elderde júrgizilgen selektsııalyq jumystyń nátıjesin óz sharýashylyqtarynda paıdalana alady.
Buǵan deıin qazaqtyń aqbas sıyry týraly kitap jaryqqa shyqqanyn jazǵanbyz.
