Qazaqtyń 1500 mýzykalyq týyndysy álemdik platformalarǵa júkteldi

Memlekettik keńesshi «Asyl mura» aýdıojınaǵynyń tusaýkeserine qatysty

Мемлекеттік кеңесші «Асыл мұра» аудиожинағының тұсаукесеріне қатысты
Фото: Ақорда

Memlekettik keńesshi Erlan Qarınniń qatysýymen Astanada qazaq halqynyń án-kúıi men folklorlyq murasy toptastyrylǵan «Asyl mura» aýdıojınaǵynyń tusaýkeseri ótti.

«Qazaqstan» respýblıkalyq teleradıokorporatsııasy jaryqqa shyǵarǵan «Asyl mura» — otandyq mýzyka óneri tarıhynda halyqaralyq strımıngterde keńinen taralǵan eń iri jınaq. Joba «Ozen» mýzykalyq leıblimen birge júzege asyryldy.

Jınaqqa «Altyn qorda» saqtalǵan 400 kúı, 300 jyr-terme, 400 halyq áni men halyq kompozıtorlarynyń ánderi, 100 ertegi, 50 besik jyry, 250 retro hıt án engizildi.

Aýdıojınaqtyń ereksheligi — mundaǵy shyǵarmanyń kóbi aýtentıkalyq formada, ıaǵnı, alǵashqy oryndaýshylary jetkizgen túpnusqa kúıinde berilgen.

Jobaǵa engen tańdamaly 1500 aýdıojazba Apple Music, Spotify, Yandex Music, YouTube Music sııaqty álemge tanymal 100-den astam mýzykalyq platformaǵa júkteldi. Sondaı-aq týyndylar «Qazaqstan» teleradıokorporatsııasynyń altynqor.com saıtyna engizildi.

Saltanatty jıynda sóz sóılegen Memlekettik keńesshi «Asyl mura» aýdıojınaǵynyń jaryqqa shyǵýy ulttyq saz óneri murasynyń álemdik platformalarda qoljetimdi etip, tól mádenıetimizdiń damýyna tyń serpin beretinin atap ótti.

Erlan
Foto: Aqorda

— Memlekettik teleradıokorporatsııanyń qorynda ǵana saqtalǵan 1500 túpnusqa týyndy álemdik mýzykalyq platformalarda jarııalanyp otyr. Bul shara Memleket basshysy Qasym-Jomart Toqaevtyń Ulttyq quryltaıdyń IV otyrysynda kótergen Ulttyq tsıfrlyq muraǵat qurý jónindegi bastamasyn júzege asyrýǵa septigin tıgizedi. Mundaı jobalar ulttyq mádenı kontentti júıeleýge jol ashyp qana qoımaı, ónerpazdardyń jańa býynyna, óskeleń urpaqqa senimdi ári baı derek kózi bolady. Sondaı-aq jasandy ıntellektiniń jadyn edáýir tolyqtyrady, — dedi Erlan Qarın.

Jınaq elimizdegi ulttyq kitaphanalar men óner ýnıversıtetteriniń kitaphanalaryna beriledi, sondaı-aq erkin saýdaǵa shyǵarylady.

Memlekettik keńesshi «Asyl mura» aýdıojınaǵynyń tusaýkeserine qatysty
Foto: Aqorda

Osyǵan deıin memleket keńesshi Erlan Qarın keshe ótken Ulttyq quryltaıdyń erekshelikteri men Prezıdent kótergen bastamalardy atady.

Сейчас читают