«Qazaqtildi jáne orystildi BAQ arasynda ıdeıalyq báseke bar ma?» - respýblıkalyq basylymdarǵa sholý
***
Keshe Astanadaǵy «Kongress-Holl» saraıynda «Nur Otan» HDP-nyń «Nur Suńqar» laýreattary óz ıelerin tapty. Shyǵarmashylyq jarystyń qorytyndylary dástúrli túrde osymen úshinshi ret jýrnalısterdiń kásibı merekesi - Baılanys jáne aqparat qyzmetkerleri kúni qarsańynda jarııalandy. Búginde «Nur Suńqar» qazaqstandyq jýrnalıster arasynda jaqsy tanylǵan respýblıkalyq baıqaýdyń biregeıine aınalyp úlgerdi. Bul jaıynda «Egemen Qazaqstan» gazetiniń beısenbilik sanynda jaryq kórgen «Nur Suńqar» ıelerin tapty» degen taqyryptaǵy materıalda keńinen baıandalǵan. «Bıylǵy baıqaýǵa respýblıkalyq jáne aımaqtyq buqaralyq aqparat quraldarynyń 200-den astam jýrnalısteri qatysty. Jeńimpazdar «Nur Otan» partııasynyń, depýtattar men depýtattyq fraktsııalardyń qyzmeti jónindegi eń úzdik saraptamalyq materıaldar, partııalyq bastamalar jónindegi aıryqsha kózqaras, eń úzdik beıne jáne fotojumystar boıynsha anyqtaldy. Jalpy, 18 nomınatsııa boıynsha úzdikter tańdaldy», - dep jazady basylym.
«Keshe Qazaqstan Respýblıkasynyń Prezıdenti Nursultan Nazarbaev Iran Islam Respýblıkasynyń Syrtqy ister mınıstri Alı Akbar Salehıdi qabyldady. Kezdesý barysynda Nursultan Nazarbaev pen Alı Akbar Salehı keń aýqymdy máselelerdi talqylady», - dep jazady «Egemen Qazaqstan» gazeti. Syrtqy ister mınıstri, Iran Prezıdenti Mahmýd Ahmadınejad Nursultan Nazarbaevty halyqaralyq arenadaǵy kórnekti saıası qaıratker retinde erekshe qurmetteıtinin atap ótti. Alı Akbar Salehı sondaı-aq, Qazaqstan Prezıdentin Taratpaý qozǵalysyna múshe-memleket basshylarynyń sammıtine shaqyrdy. Maqala «Túsinistik tuǵyry bıik» degen taqyryppen basylǵan.
***
«QR Tótenshe jaǵdaılar mınıstrliginiń 20 joǵary laýazymdy basshylarynyń 20 paıyzy joǵary attestattaý komıssııasynyń synaǵynan óte alǵan joq». Bul týraly atalǵan mekemeniń basshysy Vladımır Bojko málimdedi. «Joǵary attestattaý komıssııasy óz jumysyn aıaqtady. Atap aıtar bolsaq, joǵary attestattaý komıssııasyna jumystan bosatýǵa, laýazymyn tómendetýge qatysty da usynystar jasaldy»,-deıdi Bojko. Osy jaıynda «Aıqyn» gazetiniń búgingi sanynda jaryq kórgen «Synaqtan ótpeı qalǵandar bar» degen taqyryptaǵy maqalada keńinen baıandalǵan.
***
Bizdiń kúnde kórip tursaq ta, elegimiz kelmeıtin, baıqap tursaq ta, mán bergimiz kelmeıtin bir shyndyq bar. Bul shyndyq - mynaý: kazaqstandyq mass-medıa ıdeıalyq turǵydan qazaqtildi jáne orystildi BAQ bolyp eki topqa jiktelgen. Osy qos aqparattyq lager ózara básekeles, tuǵyrnamasy bir-birinen alshaq bolǵandyqtan, keıde qaıshylyqqa túsip jatady. Aqparattyq hám ıdeologııalyq maıdannyń kórigin bir-birine des bermeıtin qazaqtildi jáne orystildi BAQ qyzdyryp tur. Alaıda osyndaı paıdasyz baqtalastyqtan siz ben bizdiń shekemiz shylqyǵany shamaly. Bul - qazirgi qazaq mass-medıa alańyndaǵy kóp suraqqa toly ózekti jaıt. Bul maqala «Alash aınasy» basylymynyń búgingi sanynda «Qazaqtildi jáne orystildi BAQ arasynda ıdeıalyq báseke bar ma?» atty taqyryppen jaryq kórdi. Ondaǵy oıtujyrym: «Qazirgi otandyq buqaralyq aqparat quraldary ulttyq ıntegratsııaǵa jetkizýde, ulttyq ıdeıany nasıhattaýda tıimdi jumys istep otyrǵan joq. Qazaqstanda dál qazirgi kezde paralleldi túrde qazaqtildi jáne orystildi qoǵamdyq-saıası dıskýrs qalyptasqan. Bul Qazaqstan halqynyń konsolıdatsııasyna, ıdeıalyq birligine nuqsan keltirýi yqtımal».
Osy basylymnyń búgingi sanynyń «oı-kókpar» aıdarynda «Quzirettiligin arttyrý úshin jýrnalıstiń qoǵamdaǵy statýsyn anyqtaý kerek pe?» atty materıal basyldy. Osy saýalǵa «Ádil sóz» halyqaralyq sóz bostandyǵyn qorǵaý qorynyń aqparattyq daý-janjaldardy saraptaý qoǵamdyq ortalyǵynyń jetekshisi Ǵalııa Ájenova «Iá» dep jaýap qaıtarady. «Qoǵamdy jýrnalıst ózgertedi, jýrnalıst áshkereleýshi, aqıqatty aıtýshy deımiz, biraq qazirgi jaǵdaıda jýrnalıst jalǵyz. Sebebi qoǵamnyń, bıliktiń, memlekettiń múddesin qorǵaıtyn jýrnalıstiń ózi qorǵansyz. Olardy qorǵap otyrǵan bılikti, ıa bolmasa basqa bir belsendini kórip otyrǵan joqpyz. Al, shyn máninde, onyń jasap júrgen eńbeginiń mańyzdylyǵy, halyqqa jetkizemin dep júrgen aqparattyq izdenisi qandaı qurmetke bolsa da laıyq. Ol sol aqparatty úlken qıynshylyqpen qolyna túsiredi, ony tekseredi, eksheıdi, tarazylaıdy, talqyǵa salady, ol aqparaty sodan keıin ǵana úlken qıynshylyqpen halyqqa jetedi»,-deıdi ol.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev «QazMunaıGaz» ulttyq kompanııasynyń basqarma tóraǵasy Lázzat Qıynovty qabyldady. Qazaqstan Prezıdenti álemdik ekonomıka edáýir kúrdeli jáne boljap bolmaıtyn jaǵdaıda ekenin atap ótti. «Sońǵy ýaqytta qýat tasymaldaý baǵasy biraz arzandady. Mysaly, sońǵy aıda munaıdyń baǵasy barreline 107 dollardan 90 AQSh dollaryna deıin tómendedi. «QazMunaıGaz» Qazaqstannyń negizgi munaı óndirýshi kompanııasy bolyp tabylady. Álemdik rynoktaǵy qolaısyz úrdisti eskere otyryp, ulttyq munaı-gaz holdınginiń taldamalyq jáne boljam jasaý qyzmetin kúsheıtý qajet», - dedi Nursultan Nazarbaev.
L.Qıynov Qazaqstan Prezıdentine kompanııa qyzmetindegi perspektıvalyq baǵyttar týraly baıandady. Sonymen qatar, «QazMunaıGaz» basshysy 1 shildeden bastap, holdıngtiń qurylymdyq bólimsheleri - Ózenmunaıgaz ben Embimunaıgaz derbes zańdy tulǵa retinde jumysyn bastaıtynyn málimdedi.
