Qazaqtildi úzdik ınternet-saıttar anyqtalady
Jyl saıynǵy baıqaýdy uıymdastyrýshy – QR Tuńǵysh Prezıdenti – Elbasynyń qory janyndaǵy Memlekettik tildi damytý qory.
Bıyl ol tórtinshi ret ótkizilgeli otyr. Ótken úsh jyl qorytyndysy boıynsha 25 otandyq qazaqtildi saıt baıqaý laýreaty atanyp, aqshalaı syılyqqa ıe boldy.
Jeńimpazdar kelesi nomınatsııalar boıynsha anyqtalady:
«Ótkir til» — qazaq tilin jáne ulttyq qundylyqtardy nasıhattaıtyn úzdik saıt;
«Rýhanı azyq» – qazaq ádebıeti men mádenıetin nasıhattaıtyn úzdik saıt;
«Tereń izdenis» — qazaq eliniń tarıhyn nasıhattaıtyn úzdik saıt;
«Shynaıy ómir» – qoǵamdaǵy ózekti máselelerdi talqylaıtyn úzdik saıt;
«Sport tynysy» — salaýatty ómir salty men sportty nasıhattaıtyn úzdik saıt;
«Bilim bulaǵy» — bilim beretin úzdik saıt;
«Jastar álemi» — jastarǵa arnalǵan úzdik saıt;
«Aımaq aınasy» — úzdik aımaqtyq saıt;
«Balalarǵa bazarlyq» — balalarǵa arnalǵan úzdik saıt;
«Oıyn-saýyq» — úzdik oıyn-saýyq saıty.
Ár nomınatsııa boıynsha úzdik saıtqa 385 myń teńge kóleminde aqshalaı syılyq tapsyrylady. Baıqaý qorytyndysy jyl sońynda shyǵarylady.
Baıqaý jeńimpazdaryn belgili qoǵam qaıratkerleri, qalamger-jýrnalıster jáne baıqaý quryltaıshylarynan jasaqtalǵan qazylar alqasy anyqtaıdy. Saıttyń mazmuny, qyzmet baǵyty, ınteraktıvtiligi, kórkemdik jaǵy, ıdeıa ereksheligi, qoǵamǵa jalpy áseri – qazylar alqasy basshylyqqa alatyn negizgi ólshemder.
«Baıqaýǵa ǵalamtor keńistigindegi tájirıbesi keminde bir jyldy quraıtyn, qazaq tilinde aqparat taratatyn jáne qyzmet túri Qazaqstan Respýblıkasynyń qoldanystaǵy zańnamasyna qaıshy kelmeıtin kez kelgen úkimettik emes, táýelsiz qoǵamdyq saıt qatysa alady. Baıqaýǵa memlekettik organdardyń, sheteldik uıymdardyń, buqaralyq aqparat quraldarynyń elektrondyq nusqalary (gazet, tv, radıo) qatysa almaıdy. Baıqaý erejesimen Qazaqstan Respýblıkasy Tuńǵysh Prezıdenti – Elbasy Qorynyń www.fpp.kz jáne Memlekettik tildi damytý qorynyń www.qazaq-found.kz saıtynan tanysýǵa bolady», - delingen qor aqparatynda.
Ótinimder bıylǵy 20 qyrkúıekten 20 qarashaǵa deıin qabyldanady.
