Qazaqtildi saıttardy damytýǵa kóńil bólý qajet - Á.Quryshjan
ALMATY. 13 qazan. QazAqparat /Ádilet Musahaev/ - Internetten oryn tapqan elimizdiń saıttary aǵylshyn, orys jáne úsh jazý nusqasyndaǵy qazaq tilinde bolǵany jón.
Bul jaıynda búgin Almatyda Qazaq Ulttyq ýnıversıtetiniń ǴZI sektor meńgerýshisi Álııa Quryshjan qazaqtildi ınternet keńistigi jıynynda aıtty.
Onyń aıtýynsha, eger biz búkil álemge aqpar beretin qazaqtildi saıttardy damytqymyz kelse, birinshiden, onyń sheteldikter oqı alatyndaı aǵylshynsha jáne TMD elderiniń azamattaryna arnalǵan oryssha jazbalary bolý kerek. «Eger biz bir ónimdi shyǵaratyn bolsaq ony ózge memleketterge málimdep, jetkize bilýimiz kerek. Al ózimizdiń qazaq baýyrlarymyz úshin ondaǵy málimetter latyn, tóte jáne elde paıdalanyp júrgen kırıllıtsa qaripterimen jazylǵany jón. Óıtkeni Túrkııadaǵy qandastarymyz latyn árpin paıdalansa, Mońǵolııa men Qytaıdaǵy qazaqtar tóte jazýdy meńgergen», -deıdi Á.Quryshjan.
Mine osy talaptardan shyǵa alsaq bizdiń saıttar tolyq qandy aqparat bermek. Alaıda, bul kóptegen aýdarý jumystary men shyǵyndy qajet etedi, sondyqtan bizge osy máselemen jumys istegen jón, deıdi ol.
Sondaı-aq ol qazaq tilindegi saıttar qataryn kóbeıtýdi alǵa tartady. «Bıylǵy oqý jylynda qazaq mektepterinde 1,5 mıllıon oqýshy bolsa, orys mektebinde 846959 bala bar jáne munyń jartysy qazaqtar. Bul ınternettegi qazaqtildi keńistiktiń kúnnen-kúnge ulǵaıyp, suranystyń artatyndyǵyn bildiredi. Sondyqtan aqparattyq uıaly jáne tele-kommýnıkatsııalardy, aqparatty tehnologııalar, bultty tehnologııalardyń barlyǵyn qazaq tilinde jasaý qajet», -dep atap ótti Álııa Quryshjan.
