Qazaqtildi kontenttiń belsendiligi artýda- Almatydaǵy dóńgelek ústel
ALMATY. 28 maýsym. QazAqparat /Názıra Eleýhan/ - Sońǵy jyldary qazaqtildi kontenttiń belsendiligi artty. Bul týraly búgin Almatyda «Internettegi qazaqtildi kontentti damytý joldary» taqyrybynda ótken dóńgelek ústelde «Minber» jýrnalısterdi qoldaý ortalyǵynyń ókili Ashat Erkimbaı aıtty.
Onyń aıtýynsha, belsendilik birneshe faktorlarmen baılanysty. «Bıylǵy jyly naýryzda ótken qazaq blogshylarynyń quryltaıy blog salasyna qyzyǵýshylyqty arttyrdy. Sol shara ótisimen, blogshylar kóp tirkele bastady. Jyl basynan beri 500-ge deıin qazaq tildi blog tirkeldi. Ekinshiden, qazaqtildi saıası tulǵalar, depýtattar áleýmettik medıany belsene qoldana bastady. Nátıjesinde, olar saıası belsendiligin kórsete bastady, buǵan deıin beısaıası bolǵan, ne beısaıası dep tanylǵan qazaq tildi aýdıtorııa qazir depýtattyq saýalǵa ún qatyp, zańǵa baılanysty óz pikirlerin, usynystaryn aıta bastady. Búginde resmı málimet boıynsha, qazaq tilinde ınternet qoldanýshylardyń sany 5 mıllıonǵa jetip otyr. Sońǵy sanaq boıynsha, 7,5 mıllıonnan asa adam qazaqsha oqyp, túsinedi eken, ol birte-birte qazaqsha kontentke zárý, muqtaj adamdardyń sanynyń kóbeıýine jáne oǵan degen suranystyń arta túsýine yqpal etedi dep oılaımyn. Úshinshiden, qazaqtildi kontenttiń damýyna yqpal etken Vıkıpedııa jobasy. Qazir osy jobanyń arqasynda qazaq tildi málimetter 38 myńǵa shyqty. Ne degenmen, bizdi bıylǵy jyly qazaqsha konttentti damytýǵa degen serpilistiń bolǵandyǵy qýantty»,-dedi Ashat Erkimbaı.
Onyń pikirinshe, ınternette retteý bolýy kerek. «Ondaı retteý bolmasa haos bolady, biraq retteý baqylaýǵa, baqylaýdyń sońy kúshteýge, ne sebepsiz jabýǵa ákelmeýi tıis», -deıdi Ashat Erkimbaı.
Onyń aıtýynsha búginde elimizde fasebooke-tiń taralymy 300 myńǵa jýyqtap qalǵan. Ortalyq Azııa elderinde Qazaqstan fasebooke áleýmettik jelisin kóp tutynatyn el bolyp otyr.
