«Qazaqtildi «Balapan» qaz-qaz basty» - respýblıkalyq basylymdarǵa sholý

***

«Egemen Qazaqstan» gazetiniń jazýynsha, Memleket basshysy Nursultan Nazarbaev Parlament Májilisiniń tóraǵasy Oral Muhamedjanovty qabyldady. O.Muhamedjanov Memleket basshysyn Parlamenttiń zań shyǵarý jumysy, «Nur Otan» partııasynyń parlamenttiń fraktsııasynyń jumysy, atap aıtqanda, aǵymdaǵy jyldyń bıýdjetine ózgertýler engizý jáne aldaǵy úsh jyldyń bıýdjet jobasymen jumystyń barysy týraly habardar etti. Sondaı-aq osy kúni Elbasy elimizdiń Bas prokýrory Q. Mámıdi de qabyldady. Kezdesýde Bas Prokýror quqyq qorǵaý qyzmetine qatysty prokýratýra organdarynyń úılestirýshilik fýnktsııasyn kúsheıtýge, prokýrorlyq qadaǵalaýdy odan ári arttyrýǵa baǵyttalǵan Prezıdenttiń tamyzdaǵy Jarlyǵy erejeleriniń júzege asyrylýy boıynsha Bas prokýratýranyń atqaryp otyrǵan jumystary jóninde baıandady.

Qazaq óneriniń iri tulǵasy, KSRO halyq ártisi, Memlekettik syılyqtyń laýreaty, «Parasat» ordeniniń ıegeri, M. Áýezov teatrynyń belgili aktrısasy Farıda Sháripova dúnıeden ozdy. Qazaq mádenıeti men óneri aýyr qazaǵa ushyrady. «Egemen Qazaqstan» gazetiniń senbilik nómirinde QR Prezıdenti N.Nazarbaevtyń halyq ártisiniń qaıtys bolýyna baılanysty marqumnyń otbasy men týǵan-týystaryna kóńil aıtý jedelhaty jaryq kórdi. Sondaı-aq osy basylym arqyly elimizdiń birqatar jazýshylary, óner qaıratkerleri F.Sháripovamen baquldasty.

«Keshe Jambyl oblysynda Keńes Odaǵynyń Batyry, qazaq halqynyń dańqyn álemge tanytqan jaýjúrek qolbasshy, qaharman jazýshy Baýyrjan Momyshulynyń 100 jyldyǵyna arnalǵan mereıtoı saltanatty túrde ashyldy. Toı rásimi oblys ortalyǵynda erlik pen órliktiń úlgisindeı qasqaıyp turǵan qaharmannyń eńseli eskertkishine gúl shoqtaryn qoıyp, batyrdyń óshpes rýhyna taǵzym etýden bastaldy», dep jazady «Egemen Qazaqstan» gazeti «Erliktiń, tektiliktiń, órliktiń úlgisi» degen taqyrypen jaryq kórgen maqalada. Basylymnyń atap ótýinshe, er men eldik týraly taǵylymdy oılar tizbeginen turatyn konferentsııada batyr týraly osy tárizdes oılar men pikirler, ǵylymı tujyrymdar kóptep aıtyldy. Baýyrjantanýshy Mekemtas Myrzahmetov, professor B.Aıaǵan, Oral qalasyndaǵy M.Ótemisov atyndaǵy memlekettik ýnıversıtet professory H.Muhamedqalıev, Qyrǵyz elinen kelgen, sol eldiń memlekettik syılyǵynyń ıegeri G.Orozova, professor B.Hasanuly, Aýǵan soǵysy ardagerleri uıymdarynyń "Qazaqstan ardagerleri" qaýymdastyǵy tóraǵasynyń orynbasary B.Smaǵulovtardyń pikirleri men oılary ǵylymı konferentsııa taqyrybyn mazmun jaǵynan baıyta tústi.

***

Eline eńbegi sińe qoımaǵan, talantymen jarqyrap kórine qoımaǵan óner ıelerin «juldyz» dep ataýdy doǵarý kerek. Bul ataý tek qana halqynyń qurmet-dańqyna bólengen aıtýly daryndarǵa ǵana telingeni jón. Qazaqstannyń eńbek sińirgen óner qaıratkeri, óner zertteýshisi Jarqyn Shákárim «Alash aınasy» gazetine bergen suhbatynda osyndaı oı tastaıdy. «Sal-seriler men óner sańlaqtary» degen teńeý halqyna ónerimen jarqyrap kóringen júzden bir adamǵa ǵana telinetin qurmetteý bolsa, «juldyz» dep otyrǵanymyz á dep aýzyn ashqan árbir adamǵa beriletin ataqqa aınalyp ketti. Ekiniń biri «juldyz» bolǵan soń, óner adamy bolǵannan ne qaıyr bar? ıAǵnı ánshilerdi qurmetteýdiń búgingi qadiri álsiregen jáne taıazdanǵan. Máselen, Roza Rymbaevamen mektepti jańa bitirip, bir án oryndaǵan jetkinshekti «juldyz» dep qatarlas qoıýǵa dátimiz qalaı barady? Al bizdiń teleradıoarnalardan, úlkendi-kishili sahnalardan osylaı habarlanady, baspasózde de osylaı jazý qalyptasyp ketken. Menińshe, bul durys emes», deıdi zertteýshi.

Qazaqstanda tólqujat aýystyrý tóńireginde dúrligý týyp otyr. Máselen, jyldyń basynan beri qujat aýystyrmaq bolǵandardyń qatary 1,6 mln-nan asyp ketti. Ádilet mınıstrliginiń mamandary bul jaǵdaıdyń úsh sebebi bar ekenin atap kórsetedi: birinshiden, halyq jeke sáıkestendirý nómirin, ekinshiden, elektrondy chıpi bar kýálikti, úshinshiden, shengen vızasyna laıyq qujat alýǵa asyǵyp jatyr. Al bul aralyqta qujat alý jónindegi ótinishterdiń qarsha boraýymen birge qujat jasaıtyn zaýyttardyń da múmkindigi azaıyp ketkenge uqsaıdy. Qujat rásimdeý tóńiregindegi máseleler týrasynda «Alash aınasy» gazetiniń búgingi nómirindegi «1 600 000 azamat qujatyn almastyrǵaly otyr» dep atalatyn maqaladan jan-jaqty bile alasyzdar.

Ózimizdiń ózegimizden shyqqan jáne salt-dástúr, tálim-tárbıemizben órilgen arnaıy habarlarymyzdyń joqtyǵynan, tańnan keshke deıin Jetix, Niceledon sekildi ózge arnalardyń túsiniksiz mýltserıaldaryna telmirip, reseılik «Telenıanıanyń» qyzyǵyna elitken qazaq balasynyń ata-analarynan súıinshi suraımyz! Qyrkúıektiń 27-sinen bastap, elimizde kabeldik jelide qazaq tilinde ǵana habar taratatyn, tek qana balalarǵa arnalǵan «Balapan» atty telearna iske qosylady. «Balapan» qazaq balalarynyń tilin damytyp, ulttyq kózqarasy men dúnıetanymyn qalyptastyrýdy kózdeıdi. Arna ǵaryshtyq baılanystyń kómegimen keleshekte ár aýylǵa taraıtyn bolady. Bul jaıynda tereńirek bilgińiz kelse, «Alash aınasy» gazetindegi «Qazaqtildi «Balapan» qaz-qaz basty» degen maqalaǵa nazar salyńyz.

***

Memlekettik hatshy - Syrtqy ister mınıstri Qanat Saýdabaev Aq úıdiń basshysyn Qazaqstan Prezıdenti atynan Astana sammıtine shaqyrdy. Ázirge amerıkalyq prezıdentten naqty jaýap bolmaǵanymen, birneshe eýropalyq el basshylary qazirdiń ózinde osy jıynǵa qatysýǵa peıildi. Al sammıtke qatysýshylar jıynnyń mańyzdylyǵyn anyqtaıtyny aıqyn. Osyǵan oraı «Aıqyn» gazetiniń búgingi nómirinde «Obama Astanaǵa kele me?» degen maqala jaryq kórdi. Osy saýalǵa jaýap bergen Qazaqstan Prezıdenti janyndaǵy Qazaqstan strategııalyq zertteýler ınstıtýty syrtqy saıasat bóliminiń meńgerýshisi Bolat Áýelbaev «Sammıt atalýynyń ózi oǵan memleket, úkimet basshylary jınalatyndyǵynan habar beredi. Bul - eń joǵarǵy deńgeıdegi kezdesý bolmaq. Eger Barak Obama óziniń sammıtke qatysý ókilettigin Hılları Klıntonǵa júktese, onda jaǵdaı - basqa. Ázirge amerıkalyq prezıdenttiń sammıtke keletindigin tek joramaldaýǵa ǵana bolady. Alaıda, áli birde-bir AQSh prezıdentiniń munda bolmaǵany - fakt», depti.

«Svetlana Podobedova Qazaqstan quramasynyń qorjynyna ekinshi altyn júldeni saldy. Túrkııa jerinde ótip jatqan aýyr atletıkadan álem chempıonatynda Almaty oblysynyń atynan óner kórsetetin sportshymyz úsh birdeı rekordqa túzetý engizdi. Bul - onyń álemdik dodada ekinshi ret top jarýy», dep jazady «Aıqyn» gazeti senbilik sanyndaǵy «Qyzdar eki altyn áperdi endigi kezek jigitterde» maqalada. Sportshylarymyzdyń álemdik dodadaǵy óneri jaıynda sondaı-aq «Egemen Qazaqstan» gazetiniń búgingi nómirinen de oqı alsyzdar.

***

«Keshe Memleket basshysy Nursultan Nazarbaev "Atameken" saıası partııasynyń tóraǵasy Ómirbek Te­kebaevty (Qyrǵyz Respýblıkasy) qabyldady», dep jazady «Kazahstanskaıa pravda» gazeti QR Prezıdentiniń baspasóz qyzmetine silteme jasap. Kezdesý barysynda Qyrǵyzstandaǵy jaǵdaıdy turaqtandyrý máselesi, qaýipsizdikti nyǵaıtý salasyndaǵy EQYU-nyń róli talqylandy. Jýrnalısterge arnalǵan brıfıngte Ó.Tekebaev búginde Qyrǵyzstanda mańyzdy saıası úderister júrip, jańa saıası júıe qalyptasýda ekenin atap ótti. «Qazaqstan týystas respýblıka jáne EQYU-nyń tóraǵasy retinde Qyrǵyzstandaǵy jaǵdaıdy turaqtandyrýǵa naqty kómekter kórsetýde. Biz Qazaqstan men Qyrǵyzstan keleshekte de eki jaqty yntymaqtastyqty tabysty damyta beretinine senemiz», depti Ó. Tekebaev.