«Qazaqtildi aqparat tájirıbesine jańa medıa tehnologııalaryn engizý» respýblıkalyq semınar-trenıngi ótedi

ALMATY. 22 sáýir. QazAqparat - Almatyda 27-28 mamyrdyń kúnderi, Astanada 24-25 maýsymda qazaq tildi jýrnalıster úshin «Qazaqtildi aqparat tájirıbesine jańa medıa tehnologııalaryn engizý» taqyrybynda eki kúndik respýblıkalyq semınar-trenıng ótedi.

Bul týraly «Minber» jýrnalısterdi qoldaý ortalyǵynan habarlady.

Soros Qazaqstan qory, EYQU-nyń qoldaýymen «Minber» jýrnalısterdi qoldaý ortalyǵy uıymdastyratyn sharanyń maqsaty - jańa medıa tehnologııalaryn qazaqtildi BAQ tájirıbesine engizý. Semınar-trenıngte blogshylyq pen jýrnalıstik qyzmette qazaq tilinde jańa medıa tehnologııany, ǵalamtor múmkindigin (blog, mıkroblog, áleýmettik jeliler, web 2.0 tásilderi) paıdalaný tásilderi úıretiledi. Tájirıbeli jańa medıa mamandarynyń sheberlik synyptary ótkiziledi. Almaty qalasyndaǵy semınar-trenıngke qatysýǵa - Shymkent, Taraz, Qyzylorda, Aqtaý, Atyraý, Oral, Semeı, Óskemen, Taldyqorǵan qalalarymen, tıisinshe osy oblystardan úmitkerler ótinish bildire alady. Al, Almaty qalasynan 9 adam shaqyrylady. Astana qalasyndaǵy semınar-trenıngke qatysýǵa - Qaraǵandy, Pavlodar, Qostanaı, Kókshetaý, Jezqazǵan, Arqalyq, Petropavl jáne Astana qalasynan ótinish bildirýge bolady.

Trenıngke qatysamyn degen úmitker «Jańa medıa jáne qazaq basylymy», «Blogger bolǵym keledi» taqyryptarynda maqala jazyp, «Minber.kz» ulttyq ınternet gazetine 20 mamyrǵa deıin joldaýy tıis. «Bul maqala arqyly úmitkerdiń jańa medıa problemalaryn qanshalyqty túsinetindigi jáne taqyrypqa qanshalyqty yntaly ekendigi anyqtalady. Budan soń, árbir qatysýshyǵa arnaıy saýalnama paraǵy joldanady. Saýalnama paraǵyna qatysýshylar ózderi jaıly málimetterin engizýi tıis. Sondaı-aq, árbir jýrnalıst osy sharanyń aqparattyq qoldaýshysy bolǵany abzal», - deıdi «Minber» jýrnalısterdi qoldaý ortalyǵynyń prezıdenti Esengúl Kápqyzy.

Esterińizge sala keteıik, atalǵan semınar-trenıng byltyr da ótkizilgen bolatyn. «Byltyrǵy semınar nátıjesinde Órken Kenjebek, Búrkit Nurasyl, Toty Atysheva, Erbol Azanbek, Amangeldi Qurmet, Kámshat Tasbolat, Dınara Myńjasarqyzy, Erkin Qýataıuly syndy jańa medıany meńgergen qazaq blogshy-jýrnalısteri paıda boldy. Bıyl áz-Naýryz meıramy qarsańynda ótken blogshylar quryltaıy da osy semınardyń jemisi», - deıdi E. Kápqyzy.