«Qazaqtelekomnyń» tarıftik saıasaty Internettiń damýyna tosqaýyl, kedergi bolyp tur
ASTANA. Naýryzdyń 18-i. QazAqparat /Arman Asqarov/ - «Qazaqtelekomnyń» tıimsiz tarıftik saıasaty Internettiń damýyna tosqaýyl bolyp tur. Búgin Astanada ótken konferentsııada QR Indýstrııa jáne jańa tehnologııalar mınıstrliginiń departament dırektory Baqytjan Bıtemirov osylaı aıtty,
dep habarlaıdy QazAqparat.
«Internet salasyn damytýǵa tosqaýyl bolyp turǵan problemalardyń biri, ol - «Qazaqtelekom» kompanııasynyń tıimsiz tarıftik saıasaty. Osy kompanııa belgilegen Internet qyzmetteriniń kóterme qunynyń ózi provaıderlerden tutynýshyǵa berilýi tıis baǵalarymen birdeı bolyp tur. Bul Internet abonentteriniń sanyn azaıtyp, básekelestik zańdaryna múldem qaıshy. Al «Qazaqtelekom» men iri uıaly baılanys kompanııalary arasyndaǵy biryńǵaı tarıftiń bolmaýy saldarynan uıaly jáne qalalyq telefondarynan bir-birine qońyraý shalý qyzmeti tym qymbat bolyp tur», - deıdi B.Bıtemirov.
