«Qazaqtelekomnyń» 16 óńirdegi bólimsheleri beınebaılanys arqyly Joldaýdy talqylady
ASTANA. QazAqparat - QR Parlamenti Májilisiniń depýtaty, Pavel Kazantsev «Qazaqtelekom» AQ-nyń eńbek ujymymen vıdeobaılanys formatynda kezdesý ótkizdi.
Májilismenmen beınebaılanysqa atalmysh uıymnyń barlyq 16 aımaqtaǵy bólimsheleri qosyldy, ony 500-den astam adam tamashalady.
Іs-shara barysynda Pavel Kazantsev Prezıdent Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» taqyrybyndaǵy Joldaýdyń basymdyqty baǵyttaryn túsindirdi.
«Ádettegideı, Elbasynyń el halqyna Joldaýy órshil, naqty jáne qazirdiń ózinde ekonomıkasy berik qurylǵan, negizi salynǵan bolashaq ekonomıkanyń naqty basymdyqtary boıynsha jetistigine baǵyttalǵan. Sonymen qatar, qazaqstandyqtardyń ómiriniń áleýmettik suraqtary negizgi basymdyq bolyp qalady», - dedi ol.
Onyń aıtýynsha, kezdesýler barysynda túsetin usynymdar, usynystar men eskertýler Parlament Májilisine jáne partııanyń Ortalyq apparatyna dál sol kúni joldanyp otyrady.
Beınebaılanys aıasynda qatysýshylar sondaı-aq, bılik tarmaqtary arasyndaǵy ókilettikterdi qaıta bólý boıynsha konstıtýtsııalyq reformalardyń jobasyn talqylady. Depýtat otyrysqa qatysýshylardyń suraqtaryna jaýap berdi.
Buǵan deıin májilismen, «Nur Otan» partııasy fraktsııasynyń múshesi Pavel Kazantsev óńirler boıynsha jumys sapary barysynda S.Seıfýllın atyndaǵy Qazaq agrotehnıkalyq ýnıversıtetinde, Astana qalalyq Kásipodaqtar úıinde, Qazaqstan Respýblıkasy Bilim jáne ǵylym mınıstrliginde, L.N.Gýmılev atyndaǵy Eýrazııa ulttyq ýnıversıtetinde, «Báıterek» ulttyq basqarýshy holdıngi» AQ-da, «Astana-Zelenstroı» AQ-da jáne basqa da uıymdarda bolyp qaıtty..
