"Qazaqtelekomnyń" bólimshesinde tártip buzǵan azamatty kúzetshi skotchpen orap tastaǵan
Áleýmettik jelide "Qazaqtelekomnyń" Almaty bólimshesine kelgen azamatty eki er adamnyń skotchpen orap jatqan sáti túsirilgen vıdeo shyqty. Kompanııanyń baspasóz qyzmeti oqıǵaǵa qatysty túsinik berdi, dep habarlaıdy QazAqparat tilshisi.
"Qazaqtelekom" AQ baspasóz qyzmeti habarlaǵandaı, oqıǵa 4 qazan kúni Shalıapın - Beregovoı kósheleriniń qıylysynda ornalasqan kompanııanyń servıs júıesi pýnktinde bolǵan.
"Kýágerlerdiń sózinshe, S. esimdi azamat mas kúıinde front-ofıske kelgennen bastap ózin durys ustamaı, klıentter men qyzmetkerlerge balaǵat sózder aıtqan. Ǵımarattaǵy adamdar men balalarǵa qaýip tóndirdi. Tártip buzýshy qaýipsizdik qyzmetkeriniń aýyzsha eskertýlerin elemeı, orynsyz minez-qulyqtar kórsetti. Klıentter men abonenttik bólim qyzmetkerleriniń qaýipsizdigin saqtaý men quqyqqa qaıshy áreketterge jol bermeý maqsatynda polıtsııa kelgenge deıin oǵan májbúrli sharalar qabyldandy. Oqıǵaǵa klıentter de óz ómiri men densaýlyǵyn qaýipke tige otyryp, qatysty", - dep habarlady "Qazaqtelekom" AQ-da.
Kompanııa, sondaı-aq, oqıǵa bolǵan kúni ǵımaratta bolǵan barlyq klıentterinen keshirim surady.
"Biz úshin qymettiń joǵary sapasy, qyzmet kórsetý jáne klıentterdiń qaýipsizdigi basty basymdyq bolyp tabylady. "Qazaqtelekom" AQ zańgerleri quqyq qorǵaý organdarymen birlesip, jaqyn arada qalyptasqan jaǵdaıǵa zańdyq baǵa berýi tıis. Kompanııa tarapynan da qaýipsizdik sharalary kúsheıtiletin bolady", - dep atap ótti kompanııadan.
