Qazaqtelekomnyń «AI-áriptes» jobasy memlekettik organdarǵa da engizilýi múmkin
ASTANA. KAZINFORM — «Qazaqtelekom» kompanııasy jumys protsesine kómektesetin «AI-áriptes» jobasyn ázirlep jatyr. Bul týraly kompanııanyń basqarma tóraǵasy Baǵdat Mýsın halyqaralyq «Qazaq tili» qoǵamy men OpenAI kompanııasynyń birlesken jobasynyń nátıjelerin tanystyrý kezinde aıtty.
Onyń sózinshe, jasandy ıntellekt negizindegi qural ár departamenttiń jumys ereksheligin meńgerip, qujat aınalymynda jáne kúndelikti mindetterdi oryndaýda qyzmetkerlerge kómektesedi.
— Bizde «AI-áriptes» degen joba bar. Bul ár departamentte, qujat aınalymynda chat-bot retinde jumysty meńgerip, kómektesetin qural bolmaq, — dedi spıker.
Onyń aıtýynsha, joba keıin tek «Qazaqtelekom» aıasynda qalyp qoımaı, basqa uıymdarǵa da engizilýi múmkin.
— Ony birtindep «Samuryq-Qazynanyń» barlyq kompanııasyna engizý josparlanyp otyr. Sondaı-aq mınıstrlikterge de engizýge bolady, biraq bul baǵytta JI mınıstrligi de jumys istep jatyr dep oılaımyn. Al biz ákimdikterge de, mınıstrlikterge de usynyp kóremiz, — dedi kompanııa basshysy.
Baǵdat Mýsın qazaq tilindegi jasandy ıntellekt quraldarynyń sapasyna da toqtalyp ótti. Onyń pikirinshe, qazaqstandyqtar jańa tehnologııalardy tez ıgeretindikten, qazaq tilindegi JI quraldaryn belsendi paıdalaný olardyń sapasynyń artýyna yqpal etip otyr.
Sonymen qatar ol kúndelikti qoldaný úshin ChatGPT múmkindigi jetkilikti ekenin, alaıda tehnologııalyq, mádenı nemese tereń tildik mazmundy taldaýda modeldiń maǵynadan aýytqýy múmkin ekenin eske saldy. Osyǵan baılanysty Baǵdat Mýsın qazaq tilin tereń meńgergen til mamandary men tehnologııa salasy ókilderiniń birlesken jumysy mańyzdy ekenin atap ótti.
Aıta keteıik, buǵan deıin qazaq tilindegi aýdıony mátinge aınaldyrý dáldigi 98%-ǵa jetkeni jaıly jazdyq.
