«Qazaqtelekom» jedelhat jiberý qunynyń nege 169 esege qymbattaǵanyn túsindirdi
ASTANA. QazAqparat - «Qazaqtelekom» AQ-da jedelhattardy jiberý boıynsha qyzmetterdiń kúrt qymbattaýy jaǵdaıyn túsindirdi, dep habarlaıdy QazAqparat.
Parlament Májilisindegi Úkimet saǵatynda depýtat Irına Aronova halyq úshin jedelhat jiberý qyzmetiniń 169 esege ne sebepti qymbattaǵanyn surady.
«Qazirgi kezde biz telefonmen, elektrondy poshtamen baılanysqa shyǵamyz. Alaıda elektrondy poshta, sondaı-aq telefon baılanysy da koljetimdi bolmaıtyn kezder bolyp qalady. Jedelhattardy qabyldaý men jiberý «Qazaqtelekom» AQ-ǵa berilip, qyzmet kórsetý quny eselep artty. Eger de buryndary zańdy tulǵalar úshin jedelhattyń bir sóziniń quny 4 teńge bolsa, búginde bir sóz 675 teńgege jetken. ıAǵnı, burynǵy baǵadan 169 esege artyq», - dedi ol.
Sonymen qatar, depýtat bıylǵy qańtardan bastap jeke tulǵalar úshin osy qyzmet toqtatylǵanyn eske saldy.
Óz kezeginde «Qazaqtelekom» AQ basqarma tóraǵasy Qýanyshbek Esekeev bul máselege qatysty túsinik berdi.
«Elderdiń basym bóliginde bul qyzmet túrleri qoldanystan shyǵaryldy. Negizinen, SMS keńinen paıdalanylady, árbir adamda uıaly telefony bar. Sondaı-aq, telefon arqyly sózderdi shekteýsiz jiberýge bolady. Munymen qosa, halyq kóbinese WhatsApp júıesin paıdalanady. Bul qyzmet (jedelhat)jeke tulǵalar úshin ekonomıkalyq turǵyda tıimsiz boldy. Búginde endi zańdy tulǵalarǵa qatysty qymbattaý bolyp tur. Biz úshin telegrafty, jedelhattardy qamtamasyz etý shyǵyndary jarty mıllıardqa jýyq teńgeni qurady. Al qyzmet qunyn kótergenniń ózinde, túsetin tabys 39 mıllıon teńge shamasynda», - dedi Qýanyshbek Esekeev.
