Qazaqtelekom jarty jylda 58,5 mlrd teńge tabys tapty
«Qazaqtelekom» AQ bıylǵy jarty jyldy qorytyndylap, tapqan tabysy týraly aqparatty jarııa etti, dep habarlaıdy QazAqparat tilshisi.
«Bıyl 6 aıdaǵy jumys qorytyndysy boıynsha negizgi qarjylyq-ekonomıkalyq kórsetkishter ósimi artty. Jarty jyldyń qorytyndysy boıynsha kiris 330 mlrd teńgeden asyp tústi. Atalǵan kórsetkish byltyrǵa qaraǵanda 10%, al 2021 jyldyń jarty jylymen salystyrǵanda 17% ulǵaıdy. Tabystyń ósýine telekommýnıkatsııa jáne uıaly baılanys segmentiniń ósýi arqasynda qol jetti», - dedi «Qazaqtelekom» AQ bas qarjy dırektory Lıýdmıla Atamuratova kompanııanyń 6 aılyq jumysyn qorytyndylaýǵa arnalǵan jıynda.
Spıkerdiń málimdeýinshe, tabystyń artýy telekommýnıkatsııa jáne uıaly baılanysty jetildirý baǵytynda jańa jobalardy júzege asyrýǵa múmkindik beredi.
«Bıyl 6 aıdyń qorytyndysy boıynsha bizdiń kompanııanyń taza tabysy 58,5 mlrd teńgege jetti. Ótken jylǵa qaraǵanda 16% joǵary, byltyrǵy tabys 51 mlrd teńge bolǵan. Sonymen qatar, kompanııanyń kapıtaldy shyǵystary (53 mlrd teńgeden 255 mlrd teńgege) ósti. Bul jańa jobalardy iske asyrýmen de, qoldanystaǵy aktıvterdi jańǵyrtýmen de baılanysty», - dep túsindirdi Lıýdmıla Atamuratova.
Buǵan deıin «Qazaqtelekom» aktsıonerlik qoǵamy 5G jelisin ornatýda memlekettik bıýdjetke 156 mlrd teńge tólegeni týraly habarlaǵan edik.
