Qazaqtelekom vaktsınalardyń durys saqtalýyn baqylaýdy kúsheıtedi

«Qazaqtelekom» AQ Densaýlyq saqtaý mınıstrligimen birlesip júzege asyryp jatqan joba vaktsınalar men basqa da ımmýnobıologııalyq preparattardy saqtaý jáne tasymaldaý kezinde temperatýrany úzdiksiz baqylaýǵa múmkindik beredi. Júıe elimizdiń barlyq óńirindegi 18 myńnan astam tońazytqysh jáne logıstıkalyq jabdyqty qamtıdy.

Júıeniń negizgi mindeti — vaktsınalardy saqtaý men tasymaldaýdyń barlyq kezeńinde qajetti temperatýranyń saqtalýyn baqylaý. Ortalyq qoımalar men Biryńǵaı dıstrıbıýtordan bastap, medıtsınalyq uıymdardyń emshara kabınetteri men aýdandyq vaktsınatsııa beketterine deıingi búkil jol qamtylady.

Tońazytqysh kameralarǵa, muzdatqyshtar men termokonteınerlerge arnaıy symsyz temperatýra habarshylary ornatylady. Al vaktsınalardy tasymaldaıtyn kólikterdiń qozǵalysy GPS-trekerler arqyly baqylanady. Barlyq málimet biryńǵaı júıege túsedi. Eger temperatýra belgilengen mólsherden (+2…+8 °C nemese tereń muzdatý rejımi) aýytqysa, júıe jaýapty mamandarǵa birden habarlama jiberedi. Bul jaǵdaıǵa der kezinde áreket etip, qajetti shara qabyldaýǵa múmkindik beredi.

Eske sala keteıik, jobanyń pılottyq nusqasy 2025 jyly Qaraǵandy oblysynda synaqtan ótti. Endi júıe kelesi kezeńge ótip, elimizdiń barlyq óńirinde kezeń-kezeńimen engiziledi.

— Vaktsınalardy saqtaý men tasymaldaýdyń ár kezeńinde qajetti temperatýrany saqtaý — halyq densaýlyǵyna tikeleı qatysty mańyzdy másele. Tsıfrlyq tehnologııalar bul protsesti ashyq ári baqylaýǵa yńǵaıly etedi. Biz dári-dármektiń qandaı temperatýrada saqtalǵanyn, qalaı tasymaldanyp jatqanyn kóre alamyz jáne qandaı da bir aýytqý bolsa, ol týraly der kezinde aqparat alamyz. Synaq kezeńnen keıin endi júıeni búkil el boıynsha keńeıtýge kirisip jatyrmyz, — dedi «Qazaqtelekom» AQ Tsıfrlyq bıznes dıvızıonynyń bas dırektory Bahtııar Kojahmetov.

Jobanyń tehnıkalyq bóligin «Qazaqtelekom» AQ enshiles uıymy — «Tsıfrlyq ekonomıkany damytý ortalyǵy» JShS júzege asyrady. Kompanııanyń bas dırektory Bıkesh Qurmanǵalıevanyń aıtýynsha, tsıfrlyq júıe vaktsınalardy saqtaý protsesin baqylaýdyń jańa tásiline kóshýge múmkindik beredi. Sonyń arqasynda búkil protsess ashyq bolyp, memleket pen preparatty qoldanatyn azamattar úshin táýekelder azaıady.

— Buǵan deıin temperatýra kórsetkishteri qolmen qaǵaz jýrnaldarǵa jazylyp kelse, endi bul málimetter avtomatty túrde tsıfrlyq júıege túsedi. Júıeniń basty artyqshylyǵy — adam faktoryn azaıtyp, temperatýra týraly derekterdi dári-dármekterdi tańbalaý júıesimen baılanystyrý. Nátıjesinde memleket preparattyń búkil jetkizý jolyn jáne qandaı temperatýrada saqtalǵanyn baqylaı alady. Al azamattar vaktsınanyń talapqa saı saqtalǵanyna jáne qaýipsizdigine senimdi bola alady, — dedi Bıkesh Qurmanǵalıeva.

«Salqyndatý tizbegin monıtorıngteý» jobasy Densaýlyq saqtaý mınıstrligi men «Qazaqtelekom» AQ densaýlyq saqtaý salasyn tsıfrlandyrý aıasynda birlesip júzege asyryp jatqan tehnologııalyq bastamalardyń biri.