Qazaqtelekom taýarlarynyń baǵasyna qatysty tergeý bastaldy

ASTANA. KAZINFORM – Básekelestikti qorǵaý jáne damytý agenttigi básekelestik deńgeıin aıqyndaý jáne taýar naryǵyna qoljetimdi etý kezindegi kedergilerin joıýǵa baǵyttalǵan sharalardy ázirleý maqsatynda symdy (tirkelgen) ınternet qyzmetteri naryǵyndaǵy básekelestiktiń jaı-kúıine josparly taldaýdy aıaqtady.

Qazirgi ýaqytta symdy ınternet naryǵy joǵary shoǵyrlanǵan, munda jıyntyq ústem jaǵdaıǵa «Qazaqtelekom» AQ jáne «Kar-Tel» JShS (Beeline) ıe.

Taldaý barysynda agenttik qyzmet kórsetý kezinde bógde baılanys operatorlarynyń kóppáterli turǵyn úılerge kirýine, sondaı-aq kabeldik káriz jelilerine qosylýdyń tehnıkalyq sharttary týraly aqparat alýdy qıyndatatyn kedergilerdi anyqtady.

- Eger bul kedergiler sheshilse, tutynýshylarǵa ınternet qyzmetteriniń balamaly operatoryn óz betinshe tańdaýǵa múmkindik beredi jáne kabeldik káriz ıelerinen óteýsiz negizde tehnıkalyq aqparat ala alady.

Sondaı-aq anyqtalǵan kedergilerdi joıý boıynsha tıisti usynystar ýákiletti memlekettik organdarǵa jiberildi, - dep jazdy agenttikten.

Taldaý aıasynda baılanys operatorlarynyń ınternet qyzmetterine baǵasynyń dınamıkasy da zertteldi. «Qazaqtelekom» AQ-nyń is-áreketterinde taýarǵa monopolııalyq joǵary baǵa belgileý belgileri anyqtaldy. Osyǵan baılanysty agenttik básekelestikti qorǵaý salasyndaǵy zańnamany buzýshylyqtardy tergep-tekserý rásimin bastady.

Aıta keteıik, «Qazaqtelekom» jáne «Kcell-men» birlesip, frod-qońyraýlardy uıymdastyrǵan kúdikti ustaldy.