«Qazaqtelekom» Pavlodarda JI-derekter ortalyǵyn salady
ASTANA. KAZINFORM — «Qazaqtelekom» kompanııasy kelesi jyldyń ekinshi toqsanynda Pavlodardaǵy derekterdi óńdeý habynda alǵashqy 50 MVt-tyq JI-derekter ortalyǵyn salady. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.
Mınıstrdiń aıtýynsha, transshekaralyq baılanys ınfraqurylymy men qoljetimdi elektr energııasynyń bolýy halyqaralyq esepteý qýattary habyn qurýdyń mindetti sharty sanalady.
— Bul joba qazirdiń ózinde belsendi júzege asyrylyp jatyr. Pavlodar oblysynda jer telimi bólinip, GRES-1 stantsııasynan 300 MVt qýat rezervke qoıyldy. Halyqaralyq ınvestorlarmen kelissózder júrgizilip jatyr. Alaıda biz eshkimdi kútpeımiz. «Qazaqtelekom» kelesi jyldyń ekinshi toqsanynda alǵashqy 50 MVt-tyq JI-derekter ortalyǵyn salady, — dedi J. Mádıev Úkimettiń keńeıtilgen otyrysynda.
Bul derekter ortalyǵynyń qýaty memlekettik organdardyń jańa derekter ortalyǵynan, onda ornalasqan sýperkompıýtermen qosa eseptegende 10 ese joǵary bolady.
Jobalaý jáne qurylys jumystaryn 2026-2028 jyldar aralyǵynda kezeń-kezeńimen júzege asyrý josparlanǵan.
— Bul baǵyt jańa ekonomıkany qalyptastyrýǵa negiz qalaıdy. Sonymen birge, bıyl memlekettik aqparattyq júıelerdi tótenshe jaǵdaılar kezinde de turaqty jumys isteýin qamtamasyz etý úshin tolyq rezervteý júrgiziledi, — dedi Jasandy ıntellekt jáne tsıfrlyq damý mınıstri.
Buǵan deıin sala mınıstri poıyz ben ushaq jolaýshylaryna ınternet qoljetimdi bolatynyn aıtqan edi.
