«Qazaqtelekom» ókili radıatsııalyq fobııa týraly: 5G tehnologııa 4G-den eki ese az sáýle shashady

ASTANA. QazAqparat – «Qazaqtelekom» akıtsonerlik qoǵamynyń Innovatsııalar jónindegi bas dırektory Nurlan Meıirmanov 5G tehnologııasynyń radıatsııalyq qaýpi týraly pikir bildirdi, dep habarlaıdy QazAqparat tilshisi.

«Radıatsııalyq fobııa máselesine baıyppen qaraýymyz kerek. Adamdardy bul másele qorqytady. Bul jerde úgitteý emes, aǵartý jumystarymen aınalysý kerek shyǵar. Sarapshy retinde mynany aıtqym keledi. 5G-ınternetke qoldanylatyn radıotolqyndar nemese jıilik jolaqtary 2G-ınternetke qoldanylatyn jıilik jolaqtarynan áldeqaıda álsiz. Sarapshy retinde aıtaıyn, uıaly telefondaryńyzda qoldanyp júrgen 2G tehnologııaly radıotolqyndar 4G tehnologııadan 10 ese kóp sáýle taratady. ıAǵnı, telefondaǵy 4G tehnologııaǵa shamamen 200 mlVt kerek bolsa, 2G-ge 2000 mlVt kerek. Al 5G-de qýaty 100 mlVt-qa deıin tómendeıdi. Sonda is júzinde adamdarǵa kerisinshe 2G-den bas tartyp, 5G tehnologııaǵa kóshý kerek. Óıtkeni 5G tehnologııany paıdalansańyz, qolyńyzdaǵy telefon aqparat berý turǵysynan anaǵurlym az energııa shashady», - dedi ol.

Ulttyq kompanııa ókili qazaqstandyqtar 5G-diń artyqshylyqtaryn túsinse, ózderi-aq ony engizýdi talap eter edi dep esepteıdi.

«5G-diń ereksheligi energııa únemdeı alatynynda. Keńirek jıilik jolaqtary paıdalanylatyndyqtan az ýaqyt pen az qýat jumsaı otyryp, neǵurlym kóbirek aqparat júkteıdi, taratady. 5G paıda bolǵan soń sapaly kıno kórý úshin, kóbirek aqparat jiberý úshin energııa da ýaqyt ta az shyǵyndalady. Ereksheligi osynda. Tutynýshylarǵa osy málimetti durys jetkizse, ózderi-aq 5G tehnologııany tezirek engizýdi talap eter edi», - deıdi Nurlan Meıirmanov.