«Qazaqtelekom» qyzmetkerin balaǵattaýǵa qatysty qozǵalǵan «Shımofýdjı isi» sotqa joldandy - ІІD
ASTANA. QazAqparat - Astana qalasy Іshki ister departamenti Japonııa azamatynyń zaıyby «Qazaqtelekom» qyzmetkerin balaǵattap, ar-namysyna nuqsan keltirgen aýdıojazbaǵa qatysty tekserý júrgizdi, dep jazady departamenttiń baspasóz qyzmeti «QazAqparat» tilshisine bergen habarlamasynda.
«Astana qalasy Іshki ister departamenti atalǵan telefon áńgimesine qatysty tekserý júrgizdi. Tulǵaǵa qatysty QR Qylmystyq Kodeksiniń 130-baby boıynsha protsessýaldyq sheshim qabyldaý maqsatynda is sotqa joldandy. Joǵaryda aıtylǵan Qylmystyq Kodekstiń baby boıynsha qylmystyq qýdalaý jekeleı tártipte, sotqa shaǵym túsirý negizinde júrgiziledi», - deıdi ІІD.
Qylmystyq Kodekstiń 130-baby boıynsha bul jeke adamnyń ar-namysyna jáne adamgershiligine qarsy qylmys túrine jatady. Ol úshin 100 aılyq eseptik kórsetkish kóleminde aıyppul salynady nemese 120 saǵat qoǵamdyq jumystarǵa tartý kózdelgen.
Bunyń aldynda habarlanǵanyndaı, Bas prokýratýra atalmysh oqıǵaǵa qatysty tekseris júrgizýdi tapsyrǵan bolatyn. Bul aýdıojazba áleýmettik jelilerde paıda boldy. Onda japon elshisiniń áıelimin dep tanystyrǵan azamatsha «Qazaqtelekom» qyzmetkerin balaǵattaǵan. Aýdıojazbada onyń qyzmetkerlerdi «qazaqtar kalbıtter» dep qorlap, áldebir Shımofýdjı degen adamnyń esimimen qorqytqan sátteri de bar.
