«Qazaqtelekom» qunyǵyp barady» - respýblıkalyq basylymdarǵa sholý
***
Jyl saıyn Astana qalasynda Elbasy Nursultan Nazarbaevtyń bastamasymen álemdik ekonomıkalyq forým ótkizý dástúrge aınaldy. Mine, bıyl besinshi ret ótkizilgeli otyrǵan Astana ekonomıkalyq forýmyna álemniń 80-nen astam memleketterinen aýzy dýaly sarapshylar, belgili saıasatkerler, ekonomıka ǵylymynyń kóshbasshylary qatysady dep kútilýde. Álem sarapshylarynyń pikirinshe, V Astana ekonomıkalyq forýmy búgingi jahandyq ekonomıkalyq daǵdarystyń sebep-saldarlaryn aıqyndap, qıyndyqtan shyǵý joldaryn belgileıtin shynaıy álemdik pikirsaıys alańyna aınalǵan. Mamyr aıynda ótýi tıis osy halyqaralyq iri forým qarsańynda «Egemen Qazaqstan» gazeti «Ekonomıkalyq zertteýler ınstıtýty» AQ-tyń vıtse-prezıdenti Aıgúl Toqsanovany áńgimege tartqan. Suhbat «Jahandyq sheshimder qabyldaıtyn alań» degen taqyryppen berilgen.
Jaqynda Qazaqstan Respýblıkasynyń Qarýly Kúshteri óziniń 20 jyldyǵyn atap ótedi. Qazaqstan áskeriniń qalyptasýy men damý tarıhy - bul kóptegen janqııarlyq isten quralǵan, orasan zor eren eńbektiń shejiresi ekendigin búgin biz maqtanyshpen aıtýǵa qaqylymyz. Mereke qarsańynda Qazaqstan armııasynyń qurylysy, jaýyngerlik ázirligi, áskerı yntymaqtastyǵy jóninde «Egemen Qazaqstan» gazetiniń suraqtaryna Qazaqstan Respýblıkasynyń Qorǵanys mınıstri Ádilbek Jaqsybekov jaýap berdi. «Búginde Qazaqstan utqyr, jabdyqtalǵan, daıyndyqtan ótken, baılanysy men aqparaty qamtamasyz etilgen, qarý-jaraq pen áskerı tehnıkasy jetildirilgen, sapasy jaǵynan baılanys júıesi jaqsarǵan armııany damytýda. Qazirgi tańda Qazaqstan Qarýly Kúshterinde Qurlyq áskerleri, Áýe qorǵanysy kúshteri men Áskerı-teńiz kúshteri sııaqty ońtaıly úsh túrli qurylym bar. Qurlyq áskerleriniń quramyna tórt óńirlik qolbasshylyq, sondaı-aq Aeroutqyr áskerleri, Raketa áskerleri men artıllerııa kiredi», deıdi Qorǵanys mınınstri «Táýelsizdik kúzetindegi 20 jyl» taqyrybymen jaryq kórgen suhbatynda.
***
Jazdyń shýaqty kúnderi jaqyndaǵan saıyn demalysty oılaýǵa týra keledi. Shetelge shyǵamyz ba, úıde qalamyz ba? Alakól me, Ystyqkól me? Býrabaı ne Qapshaǵaı? Eń bastysy, tańdaý kóp. Qyzmetin usynatyn týrıstik fırmalar da jetilip artylady. Biraq olardy qalaı tańdaımyz? Óıtkeni týrfırmaǵa qaltqysyz sengendikten, demalysy arpalysqa aınalǵandardy kórgende, qys boıy qııaldan ketpegen teńiz, kól ádirem qalady. Sonymen qaıda baryp dem alǵan durys. Bul saýaldyń jaýabyn bilgińiz kelse, «Alash aınasy» gazetindegi «Durys demalý da ýaıymǵa aınalyp barady» degen taqyryptaǵy maqalaǵa kóz júgirtińiz.
***
«Qazaqtelekom» qunyǵyp barady». Osy taqyryppen «Aıqyn» gazetinde jazylǵan maqalada kúni keshe Májilistiń jalpy otyrysynda halyq qalaýlylarynyń «Qazaqtelekomnyń» 1 mamyrdan bastap jeke tulǵalar úshin telefon qyzmetiniń abonenttik tólemin kóterýi jaıynda óz paıymdaryn bildirgendigi jazylǵan. «Atap aıtanda, ýaqyt boıynsha aqy tóleýge aýystyrylǵandar úshin de, aýystyrylmaǵandar úshin de, tarıfter qymbattaıdy. Osydan suraq týyndaıdy: sonda ýaqyt boıynsha tólem tóleýdi nemenege engizgen? Aýylda turatyndar úshin tólem 20 paıyzǵa kóterilipti», - deıdi depýtattar.
