«Qazaqtelekom» qyzmet qunyna monopolııalyq joǵary baǵa qoıǵan – agenttik

ASTANA. KAZINFORM — Básekelestikti qorǵaý jáne damytý agenttiginiń qyzmetkerleri taldaý júrgizý aıasynda «Qazaqtelekom» AQ-nyń qyzmet qunyna monopolııalyq joǵary baǵa qoıý faktisin anyqtady. 

— Júrgizip jatqan jumys aıasynda baılanys qyzmeti naryǵynda bar birqatar kedergi anyqtalyp, olardy joıý osy sektorda ádil básekeniń damýyna yqpal etti. Osylaısha, josparly básekelestik taldaý barysynda kópqabatty turǵyn úılerdegi ınternet qyzmetine ózge baılanys operatorlarynyń kirýin qıyndatatyn kedergi anyqtaldy. Azamattar sapaly baılanys qyzmetine qol jetkizýge quqyly, kópqabatty turǵyn úılerde (ınternet úshin) symdy baılanys jelilerin básekeli jaǵdaıda ornalastyrý erekshe mańyzǵa ıe. Alaıda qoldanystaǵy zańnamalyq shekteýler keı jaǵdaıda turǵyn úılerge ózge operatorlardyń qyzmet kórsetýine múmkindik bermedi, — delingen agenttik taratqan aqparatta.

Sonymen qatar, operatorlardyń kabeldi káriz jelilerine qosylýǵa tehnıkalyq sharttar týraly aqparat alýyn qıyndatatyn kedergi de anyqtalǵan. Jergilikti monopolııa sýbektisi kabeldi-kárizdik jelilerge qosylýǵa ruqsat alý úshin suraý salynǵan jaǵdaıda tehnıkalyq shart aqyly negizde beredi. Alaıda tabıǵı monopolııalar týraly zańnamada mundaı tólem alý qarastyrylmaǵan.

Básekelestikti qorǵaý jáne damytý agenttiginiń usynysy negizinde radıojıilik spektrin (RJS) bólý boıynsha saýda-sattyqqa qatysý úshin úmitkerden keminde 6 oblysty qamtıtyn keń aýqymdy telekommýnıkatsııalyq jáne uıaly baılanys magıstraldyq jelisiniń bolýyn mindetteıtin talaptar normatıvtik aktilerden alynyp tastaldy. 
«Baılanys týraly» qoldanystaǵy zańǵa vırtýaldy operatorlardyń qyzmetin quqyqtyq retteýdi qamtamasyz etetin, sondaı-aq uıaly baılanys operatorlarynyń qýatty jalǵa alýǵa múmkindik beretin túzetýler engizildi. Bul baılanys naryǵyndaǵy básekeniń damýyna serpin beredi.

— Taldaý aıasynda baılanys operatorlarynyń symdy ınternet qyzmetiniń baǵasy da zertteldi. «Qazaqtelekom» AQ áreketinen qyzmet qunyna monopolııalyq joǵary baǵa qoıý belgileri baıqaldy. Máselen, 2024 jyly operatordyń ınternetke qol jetkizý tarıf jyldamdyǵy 100 Mbıt/sek., 200 Mbıt/sek. jáne 500 Mbıt/sek. baǵanyń ósý qarqyny 20%-ǵa deıin jetti. Qazir atalǵan operatorǵa qatysty básekelestikti qorǵaý salasyndaǵy zańnamany buzý derekteri boıynsha tergep-tekserý júrip jatyr, — deıdi agenttikten. 

Odan bólek agenttik uıaly baılanys qyzmetiniń baǵa dınamıkasyna taldaý júrgizdi. Onyń barysynda da monopolııalyq joǵary baǵa qoıý belgileri anyqtaldy. Búginde uıaly baılanys operatoryna qatysty básekelestikti qorǵaý salasyndaǵy zańnamany buzý deregi boıynsha tergep-tekserý taǵaıyndaý máselesi qaralyp jatyr.

Eske sala ketsek, Básekelestikti qorǵaý jáne damytý agenttigi «Qazaqtelekom» kompanııasynyń qyzmetin birinshe ret tergep jatqan joq.